Dyshimet/ Bashkia Belsh i hapi rrugën “Vëllezërve Hysa” për tenderin 5 mln USD të ujësjellësit

Në Foto: (Majtas) Drejtori i Përgjithshëm i AKUM, Alqi Bllako dhe kryetari i Bashkisë Belsh, Arif Tafani, gjatë prezantimit të projektit të Ujësjellësit të Dumresë

Nga BoldNews.al

Bashkia e Belshit ka shpallur së fundmi rezultatet e tenderit rreth 5 milionë dollarë për fazën e dytë të ndërtimit të Ujësjellësit të qytetit, ku fitues është shpallur bashkimi i operatorëve “Vëllezërit Hysa” dhe “GPG”, në një procedurë që krijon dyshime për paracaktim.

Në këtë tender, krahas fituesve, kanë marrë pjesë edhe dy operatorë të tjerë ekonomikë, të cilët janë skualifikuar nga autoriteti kontraktor, Bashkia Belsh.

Një prej kompanive garuese është skualifikuar, për shkak se ai “nuk ka paraqitur ofertë ekonomike”, duke krijuar dyshimet se ky operator është përfshirë në tender “vetëm për numër”.

Konkurrenti tjetër, i cili ishte një bashkim operatorësh dhe që kishte dorëzuar një ofertë më ekonomike, u skualifikua nga Bashkia e Belshit, për shkak të disa mangësive në dokumentacion, sipas argumenteve zyrtare.

Në këto kushte, garuesi i tretë, “Vëllezërit Hysa & GPG” u shpall fituesit, në një garë që duket se ka qenë e lehtë për ta, falë një konkurrenti në dukje fiktiv dhe “mbështetjes” nga autoriteti kontraktor.

LEXO EDHE  “Godet” sërish Xhaçka/ Blen 500 mijë euro ushqime e doreza tek një kompani interneti

Tenderi kishte fond limit 408 milionë lekë të reja pa TVSH, afërsisht 5 milion USD. Ai ishte shpallur në Nëntor 2019 dhe është pjesë e një projekti me disa faza për ndërtimin e Linjës kryesore për furnizimin me ujë dhe rrjetin shpërndarës të Ujësjellësit për qytetin e Belshit.

Fondi për këtë tender i është alokuar Bashkisë së Belshit nga Agjencia Kombëtare e Ujësjellës-Kanalizimeve dhe Mbetjeve Urbane (AKUM), si pjesë e projekteve të financuara për periudhën 2019-2021 nga ky institucion.

Projekti është prezantuar në Maj 2019 në Bashkinë e Belshit, ku merrte pjesë edhe Drejtori i AKUM-it, Alqi Bllako.

Vlera totale e projektit është përllogaritur në rreth 20 milionë euro dhe synimi i shpallur është “Rikonstruksioni i Ujësjellësit Rajonal të Zonës së Dumresë”.

Projekti është porositur nga Bashkia Belsh dhe Ujësjellës-Kanalizime i Elbasanit.