Nga Boldnews.al
Publiku është i bombarduar me akuza dhe kundër-akuza, denoncime dhe procedime, por dita që ligji të jetë i barabartë për të gjithë nuk po vjen, as me të ashtëquajturën “Drejtësi të re”. Më i fundit denoncim është ai i kreut të shtetit Ilir Meta kundër Ministres së Drejtësisë Etilda Gjonaj. Nuk bëhet fjalë vetëm për afera me fatura 900 euro nata për shtratin e ministres, por akuza të rënda të dyshuara për kryerjen e tre veprave penale: “shpërdorim detyre”, “ushtrim i ndikimit të paligjshëm” dhe “falsikim”.
SPAK-u, sot po merret ende me analizat e gjakut dhe të urinës së kryebashkiakut të Bulqizës Lefter Alla, nëse ka konsumuar ose jo lëndë narkotike, ku shfaqet një video teksa dyshohet se i ka hundët e zhytura në një pjatë kokainë.
Njëkohësisht SPAK ka edhe një dosje të madhe me denocime që lidhen me funksionimin e Gjykatës Kushtetuese dhe shkeljet e pretenduara për kreun e KED-së (Këshillit të Emërimeve në Drejtësi), Ardian Dvorani dhe së fundmi edhe të Ministres së Drejtësisë Etilda Gjonaj.
Të dyja denocimet kanë dalë nga zyrat e kreut të shtetit Ilir Meta. Shumëkush mund të gjykojë se është një “luftë politike”, por më së paku drejtësia e re duhet të zbardhë këto pretendime si çështje jurdike.
Meta në denoncimet e tij ngre dyshime se të dy zyrtarët, Dvorani dhe ministrja Gjonaj kanë shkelur ligjin për çështjen e emërimit të anëtarëve të Gjykatës Kushtetuese. Për Gjonajn bëhet fjalë pikërisht për një urdhër direkt të saj, duke kërkuar botimin e menjëhershëm në fletoren zyrtare të shkresës së Dvoranit i cili i sugjeronte Parlamentit se kreu i shtetit e kishte kaluar afatin 30 ditor për tu shprehur në përzgjedhjen e një prej anëtarëve të Gjykatës Kushtetuese dhe si e tillë, Arta Vorpsi zgjidhej automatikisht.
Për të realizuar qëllimin e pasjes së një “numri më shumë” në mbështetje të pushtetit, qeveria vuri në veprim Kryetarin e Këshillit të Emërimeve në Drejtësi (KED), Ardian Dvoranin, Parlamentin dhe ministrinë e drejtësisë. Qëllimi i gjithë këtij zinxhiri qe që të dëshmonte se presidenti e kishte humbur të drejtën e përcaktimit të një kandidatinë rastin e Arta Vorpsit.
Plani ishte i qartë! Më 8 nëntor 2019, kryetari i KED-së, Ardian Dvorani, kthen përgjigje Parlamentit se duke qenë se presidenti Ilir Meta nuk ka shfrytëzuar afatin 30-ditor për përzgjedhjen e një prej kandidatëve të listës dërguar nga KED, kandidatja Arta Vorpsi konsiderohet e shpallur anëtare e Gjykatës Kushtetuese.
Loja vijon… Po në në njëjtën ditë, ministrja e Drejtësisë Etilda Gjonajt urdhëron Qendrën e botimeve zyrtare (QBZ) ta botojë”vendimin” në Fletoren Zyrtare. Dyshohet se ministrja e ka çuar urdhrin për botim, përpara se kuvendi ti kërkonte këtë me shkresë. Gjithçka në nxitim për të kapur dukshëm një anëtar të Gjykatës Kushtetuese, në përdorimin e treshës: KED-Parlament-Ministri e Drejtësisë.
Të denocuarit janë juristë, madje e mbajnë veten për të mirë dhe askush nuk dyshon në “zotësinë” e tyre, por sot nuk po diskutohet mosdija, për veprime të qëllimshme, që edhe pse lenë gjurmë të dukshme, duket se kanë një garanci të fortë se nuk do të preken kurrë me abuzimet që po bëhen në ngritjen e institucioneve të reja të drejtësisë.
Nuk kanë as frikën e SPAK, që kaq shumë po mburret, por asnjë rezultat konkret, janë të zënë me një “dosje të rëndësishme”, siç është ajo e kryebashkiakut socialist të Bulqizës. Përgjigjet e analizave të gjakut dhe urinës për Allën e Bulqizës janë çështja “themelore”….!
