Nga Boldnews.al
Shqipëria merr një tjetër notë negative nga raportet ndërkombëtare, duke e renditur vendin tonë në listën gri, e cila përbën rrezik serioz për pastrimin e parave. Trafikantët, evazorët fiskalë, madje edhe organizata terroriste, mund ta përdorin Shqipërinë si vendin ku është mjaft e lehtë pastrimi i parave. Në këtë konkluzion ka arritur Task Forca Financiare (FATF) e MONEYVAL, që është një mekanizëm i përhershëm i Këshillit të Europës që ka detyrën të vlerësojë zbatimin e standardeve në luftën kundër pastrimit të parave dhe krimit të organizuar.
Megjithë problemet, Shqipëria kishte dalë nga lista gri në vitin 2015, por politikat e dy viteve të fundit, me trafikun e drogës që theu çdo raport historik dhe lehtësirat e ofruara me dëshirë për bosët e krimit, kanë bërë që të jepet alarmi se Shqipëria është i vetmi vend Europian që cilësohet me rreik të lartë, që me politikat qeveritare ka dhënë mundësinë për tu kthyer në një lavatriçe të madhe për pastrimin e parave.
Vendet e reja që janë subjekt i monitorimit janë Shqipëria, Barbados, Xhamajka, Mauritius, Myanmar, Nikaragua, Uganda. Shqipëria është e vetmja nga Europa që shfaqet në këtë listë, së bashku me Islandën.
Dhe shkaku kryesor që Shqipëria e vogël kthehet në një hapësirë të madhe për të pastruar paratë e pista të trafiqeve, evazionit fiskal, madje edhe të terrorizmit lidhet pikërisht me korrupsionin në strukturat e shtetit.
Raporti konstaton specifikisht se: “korrupsioni paraqet rreziqe të mëdha të pastrimit të parave në Shqipëri. I lidhur shpesh me aktivitetet e krimit të organizuar, ai gjeneron sasi të konsiderueshme të të ardhurave kriminale dhe seriozisht dëmton funksionimin efektiv të sistemit të drejtësisë penale. Autoritetet janë të vetëdijshëm për rreziqet nga korrupsioni, por zbatimi i ligjit deri më tani ka pasur një vëmendje të kufizuar për të shënjestruar korrupsionin e lidhur me pastrimin e parave. Një reformë e rëndësishme gjyqësore është duke u zbatuar për të adresuar më mirë rrezikun e korrupsionit që mbizotëron në vend”.
Me këtë përkufizim raporti ka ardhur në zyrat e institucioneve tona, por duket se vetëm kryeministri nuk e ka parë dhe as ka ndërmend që ta shohë. Ai është fort i zënë duke “shkruar” skenare propagandistike që po shpërndahen si telenovela, fundi i së cilës kurrë nuk dihet dhe në mendjen e tij mund të vijojë pafundësisht.
Në mënyrë indirekte është rrëzuar edhe spektakli me “OFL”, (Operacioni Forca e Ligjit) i cili asesi nuk po sjell frenim të pastrimit të parave që vijnë nga bota e krimit. Përkundrazi, ata duket se janë një pastrim edhe më i madh i figurave të krimit të organizuar, të cilët “detyrohen” të justifikojnë ndonjë makinë të blinduar, apo ndonjë shtëpi njëkatëshe, në zonën e Dukagjinit.
Europa e di mirë çfarë përfaqëson shteti shqiptar me në krye “Bablokun e madh”, që vërtitet në sallonet e politikës në Bruksesl nën haluçinacionin personal si një “lider global”. Shqipërinë ai po e “integron”, por fatkeqësisht duke e bërë të njohur për keq në çdo raport ku flitet për krim, korrupsion, trafiqe dhe pastrim parash.
