Nga Boldnews.al
Gjykata e Korçës ka konfirmuar kërkesën e Drejtorisë së Burgut të Drenovës për të vendosur në regjimin e veçantë “41 bis” të dënuarin Neim Behari, me argumentin se ka kërcënuar nga burgu gjyqtarë dhe drejtues të Burgjeve.
Përtej argumentave që ka paraqitur Drejtoria e Burgjeve dhe Prokuroria e Korçës në Gjykatë për të justifikuar aplikimin e regjimit “41 bis”, duket se kjo kërkesë është një hakmarrje e zyrtarëve të Burgut të Drenovës për një kallëzim që i dënuari Behari ka dorëzuar në Prokurorinë e Korçës.
Në atë kallëzim, të cilin “Boldnews.al” e disponon në mënyrë ekskluzive, i dënuari Neim Behari akuzon drejtuesin e burgut të Drenovës, Genci Fejzollari, për korrupsion me lejet e posaçme për të dënuarit, si edhe me plotësimin e dosjeve “shkëlqyer” për të burgosur të ndryshëm, të cilët synojnë lirinë e parakohshme.
Izolimi i Beharit
Behari, një ish-komando, i dënuar me 24 vjet burg për vrasjen e një taksisti, kërcënoi disa muaj më parë publikisht gjyqtarin e Korçës, Markelian Kuqo. Gjithashtu, pak javë më vonë, ai i dërgoi letër akuzuese drejtorit të komanduar të Burgut të Drenovës, si edhe Drejtorit të Përgjithshëm të Burgjeve, Agim Ismaili.
Shumë muaj pas këtyre ngjarjeve, me kërkesë të drejtuesve të Institutit të Ekzekutimit të Vendimeve Penale (IEVP) Drenovë, Drejtori i Përgjithshëm i Burgjeve ka urdhëruar vendosjen e Neim Beharit për 3 muaj në regjimin “41 bis”, një sistem izolimi për të dënuarit problematikë, i miratuar së fundmi nga Parlamenti.
Në bazë të ligjit “Për trajtimin e të burgosurve”, kërkesa për aplikimin e regjimit “41 bis” bëhet nga Drejtoria e Përgjithshme e Burgjeve, me indicjet e marra nga drejtuesit e burgjeve lokale. Kjo kërkesë i përcillet Prokurorisë së Rrethit Gjyqësor ku gjendet burgu, e cila më pas ia përcjell gjykatës kompetente.
Qëllimi i ligjvënësit ishte izolimi i të dënuarve, të cilët, megjithëse në burg, drejtojnë ose orientojnë grupe të krimit të organizuar. Por, ky regjim, me shumë mundësi, u jep hapësirë drejtuesve të burgjeve për të “disiplinuar” të dënuarit që nuk u binden.
Kallëzimi
“Boldnews.al” ka siguruar ekskluzivisht një letër të hartuar dhe nënshkruar nga Neim Behari, në të cilën ai akuzon drejtorin e burgut të Drenovës, Genc Fejzollari dhe disa zyrtarë të tjerë, për përfshirje në korrupsion.
Dokumenti i siguruar nga redaksia është një ankim që i dënuari Behari ka dorëzuar në Gjykatën e Korçës, në të cilin kundërshtonte vendimin e prokurorisë së qytetit për mosfillimin e procedimit penal për akuzat e cituara prej tij, në një kallëzim të Nëntorit 2019.
Në këtë “ankim” të datës 16 janar 2020, të hartuar me shkrim dore, i dënuari Neim Behari, shkruan ndër të tjera se “…Drejtori Genci Fejzollari merr 3500 euro për të siguruar transferimin e të burgosurve (nga Drenova, shën.red) në Peqin…”.
Po ashtu, sipas kallëzimit të Neim Beharit, “drejtori i burgut 500 euro dhomat…”. Në listën e të akuzuarve për korrupsion, i dënuari përfshin edhe juristen e burgut të Drenovës, të cilën e konsideron si bashkëpunëtore të drejtorit të IEVP.
Letra, e nënshkruar me emrin “Nikos Kostantinos (Neim Behari)” i është dërguar, ndër të tjera edhe Prokurorit të Përgjithshëm, Olsian Çela, në të cilën e vendos në dijeni se prokuroria e Korçës ka vendosur mosfillimin e procedimit penal për akuzat e tij, duke “mbuluar korrupsionin në burgun e Drenovës”.
Pas kësaj përballjeje ligjore me drejtuesit e Burgut të Drenovës, për të dënuarin Neim Behari aplikohet regjimi i izolimit “41 bis”.
