Partia Socialiste e drejtuar nga Edi Rama është vënë në qendër të kritikave për shkak të promovimit të personazheve me rekorde kriminale. Tanimë, PS po promovon edhe persona që kanë pasur probleme në detyrat e mëparshme. I tillë është rasti i ish-konsullit shqiptar në Janinë Pervin Gjikuria, i shkarkuar nga detyra e mëparshme për ngjarjen që u cilësua “skandali me pasaportat”.
Në muajin shkurt, u raportua se 100 pasaporta shqiptare u zhdukën në Greqi. “Gjatë transportimit të tyre nga Konsulli i Përgjithshëm i Republikës së Shqipërisë në Janinë, në një nga ndalesat e bëra për në ambasadën tonë, pikërisht në rrugën ‘Agion Asomaton’ të lagjes Thisio, Athinë, prej orës 22.50 deri në orën 00.10, automjeti me targa diplomatike u vandalizua dhe pasaportat kanë humbur”, njoftoi Ministria e Jashtme asokohe. Një muaj më pas, të njëjtat burime zyrtare informuan se konsulli Pervin Gjikuria u lirua nga detyra pasi “nga hetimet është konsideruar përgjegjës për ngjarjen e ndodhur në mesin e muajit shkurt”.
Çfarë ndodhi me Pervin Gjikurinë pas shkarkimit nga detyra? PS po e promovon, duke i dhënë mundësi të bëjë karrierë në radhët e partisë: duke e caktuar të parin e socialistëve në Himarë.
Burimet nga PS konfirmojnë që Gjikuria pritet të zgjidhet kryetari i PS-së së Himarës në mbledhjen e kryesisë, e planifikuara të mbahet ditën e shtunë.
Kështu, PS përveçse po promovon një person që ka pasur probleme me detyrën e mëparshme, po tregon se brenda partisë nuk ka garë, por emra të përcaktuar si drejtues.
