Nga Boldnews.al
Në kohën kur kriza e emigrantëve, kryesisht nga Siria, Libia, apo Afganistani kishte pushtuar Europën Perëndimore, në vitin 2016, kryeministri Edi Rama ishte gati që të hapte “kufijtë” e Shqipërisë për ti pritur dhe në “këmbim” kërkonte hapjen e negociatave. Padyshim një rrezik i madh, duke marrë parasysh kapacitet ligjzbatuese në Shqipëri, ku mes emigrantëve kishte shumë anëtarë të organiztës terroriste ISIS. Ishin vetë vendet e
BE-së që këtë ide të çartur të Ramës fatmirësisht nuk e vunë në zbatim.
Por sot jemi në pikë të hallit për fuqi punëtore. Të rinjtë janë larguar jashtë vendit. Janë zanatli kryesisht si mjeshtra të ndërtimit, elektriçistë, hidraulikë, saldatorë, hekurkthyes dhe punëtorë krahu, ku një pjesë kanë siguruar kontrata pune kryesisht në Gjermani dhe të tjerë punojnë me sezone, duke qëndruar tre muaj në mënyrë ilegale në një nga vendet e BE-së.
Nuk ka më të rinj. Ky është shpopullimi i frikshëm që i është bërë vendit me politikat e ndjekura nga qeveria, duke e zhytur vendin në varfëri, korrupsion në nivele të tmerrshme, pasiguri, grabitje prone dhe papunësi.
Teksa ndodhej për inspektim, ose thjesht shfaqje propagandistike në Durrës, Rama u njoh me shqetësimin e ndërtuesit se nuk ka punëtorë për të kryer punimet në rindërtimin e banesave pas shkatërrimit nga tërmeti tragjik i 26 nëntorit të vitit të kaluar. Rama i ka kërkuar zëvendës ministres së Brendshme Rovena Voda të fusë në punë punëtorët e bashkisë. Kryeministri tha se pas miratimit të ligjit në parlament do të sillen edhe punëtorë nga jashtë.
“Duam punë, duam punë por kur vjen puna për punë mirë që duan punë shteti por edhe kur iu thonë hajde verifikohuni jo të gjitha janë. Kjo është dhe në rajon por këtu tek ne… Ndaj ne kaluam ligjin, që rindërtimin ta kemi pa probleme, do i sjellim punëtorët nga jashtë. Vijnë nga fundi i botës për të punuar në Shqipëri, këta duan rroga shteti. Të marrin punëtorët e ndërmarrjeve, pagën që marrin atje dhe këtë që iu ofron e të punojnë. Konsiderojeni dy punësim, le të marrin dyfishin e pagës, s’ka problem… Çfarë pune di të bësh, asgjë. Çfarë pune do të bësh, doganier”, tha Rama ndër të tjera.
Po, sot kryeministri tha një të vërtetë. Vendi ka mbetur vetëm me pensionistë dhe punonjës të shtetit, Rilindas të thekur, që qëmtojnë si minj magazinash për të rrjepur edhe më shumë qytetarët e vërfër që kërkojnë një të drejtë në zyrat e shtetit. Edhe këtë pjesë Rama e ka “zgjidhur”, pasi degdisi me koshiencë të plotë qytetarët jashtë vendit nga keqqeverisja, sot kërkon punëtorët jashtë vendit për të shërbyer për rindërtimin e banesave nga tërmeti.
Largoi jo vetëm intelektualë dhe të rinj me profesione të ndryshme si mjekë, infermierë, arkitektë, ekonomistë dhe inxhinierë por edhe fuqinë punëtore. Largim kaq masiv nuk është shënjuar as në kohë luftërash, që nga periudha e Perandorisë Otomane dhe deri më sot! Nuk ka më asnjë dilemë, dëshira për të zhdukuar të rinjtë shqiptarë nga vendi është e realizuar.
