Sekretari i Përgjithshëm i PD-së, Gazment Bardhi, ka reaguar ndaj fakteve të publikuara nga Presidenti Ilir Meta, mbi atë që e konsideroi “veprimtari e organizuar kriminale” nga kreu i KED-së, Ardian Dvorani.
Meta kërkoi hetim të thelluar ndaj Dvoranit dhe deklaroi depozitimin e fakteve të reja në organin e akuzës.
Ndërkohë, Bardhi në reagimin e tij tha se “faktet e bëra publike dëshmojnë, edhe njëherë, në mënyrë të pakundërshtueshme, përdorimin e Ardian Dvoranit si mekanizëm për kapjen politike të Gjykatës Kushtetutese nga Edi Rama”.
Sipas tij, manipulimi kriminal i fakteve dhe fshehja e të dhënave janë një krim i rëndë shtetëror.
“SPAK duhet të veprojë menjëherë dhe pa asnjë hezitim.
Kapja e Gjykatës Kushtetuese është jetike për Edi Ramën. Është mënyra e vetme për t’i hapur rrugë projekteve të tij për kriminalizimin total të shtetit, bashkëqeverisjen me oligarkët dhe krimin e organizuar, si dhe për të patur kontrollin politik mbi çdo pushtet dhe institucion të pavarur”, tha Bardhi.
