Java e 21-të e Kategorisë Superiore u hap ditën e djeshme me klasiken e futbollit shqiptar ndërmjet Vllaznisë dhe Tiranës, e cila u mbyll 0-1 në favor të kryeqytetasve.
Ndërsa ditën e sotme do të luhen katër takime të cilat përmbyllin javën e 21-të. Kështu në orën 14:00 Kukësi do të përballet me Laçin në “Elbasan Arena” në një ndeshje mjaft interesante, ku verilindorët do të provojnë të marrin maksimumin për t’u rikthyer sërish në krye të renditjes.
Verilindorët kanë në dispozicion të gjithë arsenalin e skuadrës dhe do të hedhë në fushë më të mirët për të marrë maksimumin ndaj kurbinasve, që gjithashtu po kalojnë një moment të mirë.
Po në orën 14:00 në Korçë do të luhet përballja mes Skënderbeut dhe Bylisit, një ndeshje mes dy skuadrave që kanë prodhuar sfida mjaft interesante mes tyre. Bardhekuqtë vijnë pas një humbjeje në Laç, por në Korçë kanë marrë maksimumin këtë fillim-sezoni dhe do të kërkojnë një tjetër sukses sot.
Nga ana tjetër Bylisi nuk ka fituar ende një ndeshje kampionati për vitin 2020, por nuk duhet të harrojmë që edhe në fillim të sezonit situata te ballshiotët ishte njësoj deri në transfertën korçare, ku morën fitoren e parë sezonale.
Në orën 17:00 Partizani do të presë Flamurtarin në stadiumin “Selman Stërmasi”, në një ndeshje mjaft të lehtë në letër, që do t’i ndihmojë kampionët në fuqi të krijojnë një vazhdimësi rezultatesh, duke marrë suksesin e dytë radhazi.
Pas fitores në Gjirokastër ndaj Luftëtarit, kjo është një tjetër ndeshje ku të besuarit e Sormanit duhet të marrin maksimumin, për të mos u shkëputur edhe më shumë nga Tirana e Kukësi, që vrapojnë në krye të renditjes.
Ndeshja e fundit është ajo mes Teutës dhe Luftëtarit të Gjirokastrës në “Niko Dovana”. Duhet të jetë kjo një ndeshje rikthimi për durrsakët pas humbjes me Tiranën, duke marrë parasysh se përballë ka një skuadër me probleme si Luftëtari, që gjithsesi kanë treguar se dinë të luftojnë në fushën e lojës.
Durrsakët kanë një organikë mjaft cilësore dhe këtë e treguan edhe ndaj Tiranës, ku rezistuan dhe luftuan deri në fund, ndonëse kishin një lojtar më pak në fushë për shumë minuta, ndërsa sot pritet të bëjnë detyrën ndaj Luftëtarit.
