Këshilli i Sigurimit të OKB-së do të zhvillojë nesër një takim urgjent mbi ngjarjet e fundit në veriperëndim të Sirisë, ku janë zhvilluar luftime mes ushtarëve turq dhe atyre sirianë, theksuan sot diplomatët.
Takimi u kërkua nga SHBA-ja, Franca dhe Britania e Madhe.
“I dërguari i OKB-së për Sirinë, Geir Pedersen do të bëjë një përmbledhje për situatën në rajonin e Idlebit gjatë këtij takimi që do të jetë publik”, sipas të njëjtit burim.
Gjatë përplasjeve të reja, shkëmbimet e zjarrit mes Turqisë dhe regjimit sirian kanë shkaktuar më shumë se 20 të vdekur, me rrezikun e destabilizimit të mëtejshëm të provincës së Idlebit, bastioni i fundit i dominuar nga xhihadistët dhe rebelët ku situata humanitare mbetet kritike.
Dje, sekretari i përgjithshëm i OKB-së, Antonio Guterres kërkoi një ndërprerje të armiqësive mes turqve dhe sirianëve duke përmendur një ndryshim shumë shqetësues në natyrën e konfliktit.
Presidenti turk, Recep Tayyip Erdogan i dërgoi sot një ultimatum regjimit të Bachar al-Assad që të tërheqë trupat, e mbështetur nga aviacioni rus, në veriperëndim të Sirisë
