Ardian Visha, avokati i Agron (Geron) Xhafajt, ka mashtruar mbrëmjen e sotme opinionin publik, lidhur me çështjen ndaj vëllait të ish-ministrit të Brendshëm, ku një ditë më parë gjyqtari Artan Gjermeni shpalli vendimet duke dënuar ish-deputetin Ervin Salianji, gazetarin Jetmir Olldashi si dhe Albert Veliun, i njohur si “Babalja”.
Visha ndër të tjera tha se dënimi erdhi pasi personat bënë “kallzim të rreme”, ndërkohë që nuk ka pasur asnjë kallzim lidhur me çështjen në fjalë, përveç denoncimit publik, ku ish-deputeti Salianji në një konferencë për mediat paraqiti video-përgjimin që implikonte Xhafajn në trafikun e narkotikëve.
Ndërkohë Prokuroria e Krimeve të Rënda ka regjistruar çështjen kryesisht, duke qenë se ishte një çështje që kishte të bënte me trafikimin e lëndëve narkotike.
Lidhur me deklaratën mashtruese të Vishës ka reaguar edhe avokati i gazetarit Jetmir Olldashi, Indrit Sefa, i cili sqaroi se “duke qenë se kemi të bëjmë me një çështje që ligji parashikonte dënime nga 7 vite burg, u autorizuan përgjimet, të cilat u bënë vetëm ndaj atyre që denoncuan trafikimin, por jo trafikuesit”.
Visha tha se ekspertizën që ai ka bërë privatisht në Itali lidhur me zërin e shfaqur në video-përgjim, ka rezultuar se ai nuk është i klientit të tij.
Ndërkohë që ekspertiza e kryer në Angli ka konkluduar se ka ngjshmëri me zërin e Geron Xhafajt, por sipas Vishajt, ai ka ngjashmëri edhe me zërin tjetër.
Një moment tjetër që Vishaj ka mashtruar ishte ajo që ditën që është bërë video-regjistrimi, Geron Xhafaj, nuk ka qenë në Vlorë.
Por, sipas avokatit Sefa dhe ish-deputetit Ervin Salianji, antenat e telefonisë celulare, tregojnë se qelizat telefonike tregojnë se Geron Xhafaj ishte në Vlorë, ashtu sikundër Albert Veliu dhe gazetari, Jetmir Olldashi.
Vishaj, një nga drejtuesit e sektorëve të rëndësishëm të Prokurorisë së Përgjithshme, është akuzuar publikisht përsa i takon lidhjeve të tij me element kriminalë.
Ndërkohë, si avokat ai ka marrë në mbrojtje grupe dhe individë kriminalë me precedentë të fortë kriminalë, që shpesh janë denoncuar publikisht si të lidhur me të majtën.
