Në senacën e sotme parlamentare pritet të kalojë për miratim paketa e censurimit të mediave nga qeveria “Rama”, ku kreu i Grupit Parlamentar të Partisë Socialiste, Taulant Balla ftoi dje deputetët që të mbështesin miratimin e kësaj paketë.
Por kjo paketë ligjore është kundërshtuar fort nga mediat dhe gazetarët, të cilët kanë pohuar se nuk ka nevojë për ligje ekstra, por kanë këmbëngulur, që mediat elektronike duhet të aplikojnë parimin e vetërregullimit.
Po ashtu është kritikuar dhe nga Këshilli i Evropës dhe organizatat ndërkombëtare të medias të cilët e kanë vlerësuar si pengim të fjalës së lirë dhe ju kanë bërë thirrje dhe deputetëve të mos e votojnë.
Gazetarët, aktivistët dhe analistë, mbështetur dhe nga opozitarët, do të zhvillojnë paraditen e sotme një protestë kundër kësaj pakete të kryeministrit Rama. Protesta pritet të nisë në orën 09:30, para Parlamentit, aty ku deputetët do të zhvillojnë në orën 10:00 seancën plenare, ku në rend dite është edhe votimi i kësaj pakete.
Shoqatat e gazetarëve dhe shoqërisë civile kundërshtojnë këtë paketë me pretendimin se ajo nuk i jep zgjidhje lajmeve të rreme dhe shpifjeve, siç pretendon qeveria, por është përpjekje për të kapur median online.
E propozuar nga qeveria me në krye kryeministrin Edi Rama kjo paketë ligjore parashikohet që Autoriteti i Mediave Audiovizive (AMA) të marrë kompetenca deri në mbylljen e portaleve, nëse gjykon se ka publikuar lajme të rreme apo shpifje.
Ndërkohë, kundërshtarët e paketës theksojnë se ky vendim mund të merret vetëm nga Gjykata dhe se asnjë institucion tjetër nuk mund të marrë kompetencat që i takojnë drejtësisë.
