Kohë tërmeti/ Dyshime mbi tenderin 1.6 milionë USD për lavanderi në Spitalin e Fierit

Nga Boldnews.al

Në një kohë kur pjesa më e madhe e institucioneve shtetërore po anulojnë tenderat “jo-urgjentë” për shkak të dëmeve nga tërmeti i 26 Nëntorit, Spitali Rajonal i Fierit po përgatitet të zhvillojë tenderin për lavanderinë për 3 vitet e ardhshme, me një vlerë mbi 1.6 milionë dollarë.

Në datë 22 Nëntor 2019, vetëm pak ditë para lëkundjeve sizmike që morën jetën e 51 qytetarëve dhe shkatërruan me mijëra banesa, Spitali Rajonal i Fierit shpalli tenderin për shërbimin e lavanderisë për periudhën 3-vjeçare.

Fondi limit për këtë tender është përllogaritur në 162.5 milionë lekë të reja (ose 1.6 miliardë lekë të vjetra), i ndarë për çdo vit nga 540 milionë lekë (të vjetra), në periudhën 2020-2022. Sipas të dhënave zyrtare, ofertat e pritshme do të hapen në 26 Dhjetor 2019.

Por, pak pas shpalljes së tenderit, duke u gdhirë 26 Nëntori, Shqipëria e mesme u përfshi nga tërmeti tragjik, me pasoja shumë të rënda.

Për shkak të situatës së krijuar, Qeveria shpalli “Gjendjen e Fatkeqësisë Natyrore”. Një ndër masat më emergjente të ndërmarrë në kuadër të kësaj “Gjendjeje..” ishte edhe Urdhëri i Ministrisë së Financave për anulimin e tenderave të rinj, të cilat nuk kishin objekt të tyre çështje të emergjencës apo që nuk lidhen me pasojat e tërmetit.

Një seri institucionesh i janë përgjigjur këtij Urdhëri, duke anuluar procedurat e prokurimit publik, të cilat nuk përfshijnë situata emergjente.

Por, Urdhëri i ministres së Financave, Anila Denaj, nuk rezulton të jetë “përfillur” nga Spitali Rajonal Fier, i cili ende nuk ka njoftuar për anulim të mundshëm tenderi për shërbimin e lavanderisë për 3 vitet e ardhshme.

LEXO EDHE  Koronavirusi/ Tre viktima në 24 orët e fundit në Shqipëri

Tenderat në sektorin e Shëndetësisë ndjekin një linjë të caktuar brenda institucionale. Institucionet rajonale shëndetësore planifikojnë zhvillimin e tenderave dhe, paraprakisht, marrin një autorizim nga Ministria e Shëndetësisë, e drejtuar nga Ogerta Manastirliu.

Në të njëjtën logjikë, edhe anulimi i mundshëm i tenderit duhet të ndjekë të njëjtën procedurë. Gjithësesi, në bazë të të dhënave publike, rezulton se tenderi 1.6 miliardë lekë (të vjetra) i Spitalit të Fierit vijon të jetë ende në fuqi, pra në pritje të finalizimit.

Burime konfidenciale për “Boldnews.al” bëjnë të ditur se ky tender, me shumë mundësi, mund të mos anulohet, pavarësisht situatës së “Fatkeqësisë Natyrore”. Sipas burimeve të besueshme të redaksisë, tenderi mund të jetë me fitues të paracaktuar.

Të njëjtat burime identifikojnë edhe fituesin, pavarësisht se procedura ende nuk është mbyllur. Dyshimet janë se fitues do të shpallet një prej kompanive, e cila përfshihet në listën e shoqërive private që ka fituar një numër të konsiderueshëm tenderash në këtë fushë.

Boldnews.al” ka edhe emrin e kompanisë që, sipas burimeve, është paracaktuar për fituese. Gjithësesi, duke qenë se për momentin dyshimet janë në kuadrin e hipotezave, për sa kohë që tenderi ende nuk është mbyllur, redaksia rezervon të drejtën që për momentin të tregohet diskrete në përmendjen e emrave të përveçëm të subjektit privat.