Në prag të ndeshjes mes Partizanit dhe Tiranës, trajneri i “të kuqve”, Franco Lerda ka dalë në konferencën për shtyp, ku ka folur për skuadrën e tij por edhe për Tiranën.
I pyetur nëse Partizani vjen si favorit në këtë ndeshje, ai përgjigjet:
“Mendoj që në ndeshjet derbi, nuk ka skuadra favorite. Mendoj se lojtarët duhet të përgatiten sa më mirë për ta përballuar këtë sfidë”.
“Sa i përket frazës, nëse luhet apo fitohet, kjo është ndeshje që fitohet, duke parë mbështetjen dhe besimin që tifozët kanë. Duhet të fitohet dhe për ta fituar duhet të zhvillohet një lojë perfekte. Shpresoj që Tirana të ringrihet në objektivat që ka, por jo nesër. Mendoj se është prezente dhe do të luftojë deri në fund”.
Ndërsa i pyetur për mungesat e Telushit, Brojas dhe Malës, se cili prej tyre peshon më shumë, Lerda thotë:
“Për mua janë të rëndësishëm ata që kam në dispozicion, ata që nuk janë, nuk i llogaris. Kemi një organikë të gjerë, nuk kemi qarë kur na ka munguar kush. E kemi përgatitur ndeshjen me ata që kemi në dispozicion, jo me ata që s’janë”.
Partizani-Tirana, luhet ditën e nesërme në “Air Albania Stadium”, ora 19:00.
