Kryeministri Edi Rama është përballur me kritikat dhe kërkesat e qytetarëve të Laçit, që janë prekur nga tërmeti i 26 nëntorit.
Rama u shpreh se atyre që u janë shembur shtëpitë, apo që klasifikohen si të pabanueshme, do të ndërtohen.
“Ku të rrimë ne z. Kryeministër. Kam babain 68 vjeç, unë jetoj në Zvicër, dhe kam ardhur pas tërmetit, pasi kam dy pleq që rrinë në një shtëpi që u është thënë se është e pabanueshme”, u shpreh një qytetare, ndërsa i kërkoi Ramës një afat se kur do t’i ndërtohej shtëpia.
Por Rama i tha se tani duhet të rrinë në çadrat dimërore dhe shtëpitë do të ndërtohen më të mira se ato në Zvicër.
“Në çadra dimërore të rrinë, nuk fusin as ujë as erë, janë me energji, me televizor me të gjitha”, tha Rama.
Kryeministri nuk dha një afat se kur mund të ndërtohen banesat e shembura.
“Do të ndërtojmë 140 apartamente në Laç, por po të jetë e nevojshme mund të ndërtojmë edhe dyfishin e tyre”, tha Rama.
