Qeveria dhe opozita duhet të gjejnë rrugët e dialogut në mënyrë që të mos kompromentojë procesin e integrimit evropian. Është ky apeli i ministrit të Jashtëm italian, Luigi Di Maio, pas takimit që ka zhvilluar me Kryeministrin, Edi Rama.
“Ndodhem këtu për të shprehur solidaritetin dhe mbështetjen e Italisë në rrugëtimin e integrimit evropian. Theksova mbështetjen e palëkundur ndaj Shqipërisë dhe Maqedonisë së Veriut dhe në vijim të vendimit të mos çeljes se negociatave që u mor në tetor.
Italia instiston mbi nevojën e një vendimi pozitiv për të dyja vendet dhe për të caktuar një datë për konferencën së parë ndërqeveritare dhe një mandat për komisionin për te pergatitur edhe kuadrin e negociatave.
I shpreha dëshirën që gjithë aktorët politikë të angazhohen edhe më tej në rivendosjen në një klimë politike të tillë që të mos kompromentojë rrugëtimin e integrimit evropian, duke favorizuar një ulje të tensioneve dhe hapjen e kanaleve të përballjes dhe dialogut”, tha Di Maio.
Ndërsa Kryeministri Edi Rama duke falenderuar Italinë për ndihmen që dha pas tërmetit të 26 nëntorit, u shpreh se kishte diskutuar me kreun e diplomacisë italiane për reformën në drejtësi, ligjet e reja kundër KCK, krimit të organizuar dhe mbi njësinë speciale kundër korrupsionit.
“Diskutuam edhe për aspekte të partneritetit tonë strategjik. Italia ka qenë dhe mbetet partneri ynë i parë në marrëdhëniet ekonomike e tregtare, vendi që nuk është kursyer asnjëherë në transformimih e vendit nga një diktaturë në një demokraci funksionale.
Kryeministri italian më ka konfirmuar gatishmërinë e Italisë për të mbështetur edhe me njerëz në terren, një bashkëpunim konkret e të përditshëm”, tha Rama.
