Plani me 5 pika/ Basha propozon platformën për rimëkëmbjen e bizneseve në zonat e prekura nga tërmeti

Kryetari i PD-së, Lulzim Basha, ka propozuar një platformë me 5 pika lidhur me rimëkëmbjen e bizneseve në zonat e prekura nga tërmeti.

Në paketën e propozuar, kërkohet anulimi i taksës së pasurisë dhe të gjitha taksat dhe tarifat vendore për periudhën e rindërtimit.

Gjithashtu propozohet përjashtimi i taksës së të ardhurave për të gjitha subjektet që ri-investojnë fitimin për të rikuperuar dëmet e tërmetit.

Po kështu propozohet pezullimi i pagesave për energjinë dhe ujit gjatë kohës së katastrofës natyrore, përjashtimi nga TVSH i materialeve që përdoren për rikuperimin e dëmeve, si dhe pezullimin e kontributeve të sigurimeve shoqërore dhe shëndetësore për periudhën deri në rikuperimin e dëmeve.

Përmes një postimi, kreu demokrat thekson se tërmeti i 26 nëntorit ka shkaktuar dëme të mëdha në ekonominë e Durrësit dhe zonave të tjera.

LEXO EDHE  Dërgonin njerëz në SHBA, Kanada dhe Britani me viza false/ SPAK kap grupin kriminal! Emrat

“Mijëra vende pune, biznesi i vogël dhe ekonomia prodhuese janë nën presion. Njësitë e hoteleri-turizmit përballen me rënie konsumi dhe i tremben reduktimit apo anulimit të prenotimeve.

Për të ndalur futjen e Durrësit në një “dimër ekonomik” me pasoja të rënda sociale që do të vinin nga reduktimi i numrit të të punësuarve, ulja e pagave të punonjësve dhe mbyllja e bizneseve, për të mundësuar një rigjenerim të ekonomisë prodhuese, shërbimeve dhe biznesit të vogël në zonat e dëmtuara, propozojmë këtë paketë të thjeshtë dhe realiste”, thekson Basha.