“Kënga Magjike” u fitua nga këngëtarja Eneda Tarifa me këngën “Ma zgjat dorën”, një këngë e punuar nga Flori Mumajesi. Në vlerësimin e pikëve, ka pasur hatërmbetje mes këngëtarëve.
Ardit Çuni ka qenë ai i cili ka shprehur publikisht hatërmbetjen dhe zemërimin e tij ndaj Eneda Tarifës. Këngëtari i cili është mik prej kohësh i Enedës, ka deklaruar se është lënduar shumë që këngëtarja nuk e ka vlerësuar me asnjë pikë në festival, ndërkohë që ai e votoi me pikët maksimale. I ftuar në “Thumb on”, Arditi zbuloi edhe mesazhin që i dërgoi Enedës duke i thënë se ndoshta ka qenë Flori Mumajesi , ai që ka vendosur për pikët e saj.
“Unë dhe Eneda jemi miq prej kohësh, jo të ngushtë por miq prej kohësh. Të dhemb më tepër kur e ke afër. Nuk jam mërzitur pse nuk dola në finale se u bë lëmsh me votimet. Pse u lëndova është fakti që unë nuk i toleroj dot pafytyrësitë. Nuk doja të bëja lajm mediatik, nuk doja të reagoja. Madje mbrëmë po e ndiqja në shtëpi festivalin dhe u shokova kur pashë. Të gjithë miqtë më shkruajnë që si ka mundësi që Eneda më kishte dhënë 0 pikë. I shkruajta Enedës dhe i thashë, e di që po pret një mesazh urimi, por ndoshta vendosi producenti jot i dashur, Flori Mumajesi për pikët e tua”, tregoi Arditi.
Ndërsa mesazhi që i kishte kthyer Eneda ishte: “Meqe ke vendosur ta bësh publike, bëje, në të kundërt mesazhin do ia çoj Florit”.“I thashë mos u shqetëso sepse mesazhin ia kam derguar vet Florit”, tregoi Arditi.
Këngëtari ka deklaruar gjithashtu se ky ishte viti i fundit që ishte në “Kënga Magjike”.
