Kryeministri Edi Rama ka kërcënuar sërisht mediat, madje me doza të forta duke u shprehur “mos na detyroni të bëjmë atë që s’ua rrok imagjinata”.
Për të disatën herë, Kryeministri ka identifikuar si “armiq” të situatës mediat, që kanë ndjekur dhe raportuar hap pas hapi situatën e krijuar, që nga momenti i tërmetit të 26 nëntorit, i cili shkaktoi 51 viktima dhe disa qindra të lënduar e plagosur.
Situata pas tërmetit është mjaft e rënduar, pasi disa qindra familje kanë humbur banesat e tyre dhe janë strehuar në hotele, qendra akomodimi, apo te të afërmit e tyre.
Mediat raportuan, ndoqën situatat, hyjnë në çdo zonë pavarësisht rrezikut, shiut apo lëkundjeve të vazhdueshme. Pasqyruan tragjedinë e ndodhur, pa kursyer edhe lotët në lidhjet direkte, sikundër kanë denoncuar abuzime me ndihmat, kanë përcjellë ankesat e qytetarëve, kanë publikuar pamje nga kampet e ngritura apo rradhët e gjata të njerëzve në pritje të ndihmave, batanijeve apo ushqimeve.
Të gjitha këto duket se janë shkaku i reagimit të fortë dhe kërcënues të Kryeministrit, edhe pse mediat mund të kenë problemet e tyre në funksionim.
Por kjo situatë tregoi se me të mirat dhe të këqiat e saj mediat funksionuan, ndoshta kanë publikuar pamje edhe të rënda, ndoshta në kushtet e një tensioni dhe paniku, ka pasur edhe raportime të ekzagjeruara, por ato kanë funksionuar shumë më mirë, se grupet e emergjencave, pavarësisht premtimeve të ministres së Mbrojtjes, pak muaj më parë.
Të gjithë kanë parë se forcat e angazhuara në operacionet e kërkimit nuk kishin as doreza dhe jo më pajisje, pavarësisht përkushtimit të tyre për të shpëtuar sa më shumë jetë njerëzish.
Hiqnin me duar çdo inerte, në kushte ekstreme, por jo të pajisur, sikundër mund të kishin grupet e ardhura nga Kosova, për të mos përmendur Italinë, Greqinë, Rumaninë etj.
Gjithsesi, sërisht fajtori janë mediat, që po identifikohen në një situatë emergjence si delja e zezë.
Në postimin e tij, Rama përmend Japoninë, ndërsa shkruan “Japonia ka masa ekstreme për mediat private, që mesa duket edhe në Japoninë e urtësisë së vjetër, paskan qenë taksirat mbi taksiratin e madh të tërmetit! Mos na detyroni të bëjmë atë që s’ua rrok imagjinata!”.
Dhe krahasimi i parë që gjithkujt i vjen në mendje është po në Shqipëri u veprua si në Japoni lidhur me situatën pas tërmetit?
“Filtroni informacionet dhe verifikoni ato që thoni”. Kryeministri Edi Rama ka paralajmëruar sërish mediat sot dhe u ka bërë thirrje gazetarëve dhe moderatorëve “menaxhoni debatet dhe ndaloni klithmat nëpër studiot tv dhe përfshihuni në qetësimin e shpirtrave të goditur më keq se banesat.
Mos na detyroni të bëjmë atë që s’ua rrok imagjinata!”, shkruan kryeministri në Twitter.
