Prokuroria e Tiranës ka paraqitur pretencën për 14-vjeçarin Mario Përlleshaj, i akuzuar për vrasjen e Martin Canit dhe plagosjen e Luis Meçjes. Organi i akuzës kërkoi 25 vite burg për veprën penale “vrasje në rrethana cilësuese kundër dy ose më shumë personave”.
Megjithatë, prokurorja Alma Felaj theksoi se vendimi final i lihet gjykatës, duke kujtuar se Kodi Penal për të miturit kufizon dënimin maksimal në 12 vite.
Kjo do të thotë se, pavarësisht kërkesës, gjykata mund të vendosë një dënim shumë më të ulët për shkak të moshës së autorit.
Në seancën e radhës pritet të paraqiten konkluzionet e mbrojtjes dhe qëndrimi i familjarëve të viktimës. Ndërkohë, vetë i mituri ndodhet prej nëntorit 2024 në institucionin e të miturve në Kavajë, pasi gjatë përleshjes mbeti i plagosur edhe ai vetë.
Ngjarja e rëndë ndodhi më 18 nëntor 2024, pranë shkollës “Fan Noli”, vetëm pak ditë pasi adoleshentët kishin pasur një konflikt të mëparshëm.
