Patozi thumbon Ramën, Metën e Bashën: Reforma Zgjedhore po garanton riprodhimin e përbindëshave politikë…

Astrit Patozi, ish-deputet dhe drejtues i Bindjes Demokratike, përmes një postimi në rrjet ka thumbuar Presidentin Ilir Meta, Kryeministrin Edi Rama dhe kreun e PD-së, Lulzim Basha, lidhur me përplasjet dhe krizën politike në vend.

Patozi shkruan se Meta, Rama e Basha janë super-organizuar në kaosin e luftës së tyre.

“Vini re sa të organizuar janë në spontanitetin dhe kaosin e luftës së egër midis tyre!

I pari ka vendosur ta mbrojë kushtetutën me trupin e vet, qoftë edhe i vetëm në një betejë titanike, ku është zbuluar se palaçot ndërkombëtarë janë duke flirtuar me armikun.

I dyti na thotë të ëndërrojmë mrekullinë, që do të shpërthejë në “Shqipërinë që duam”, duke na tundur para syve flamurin e rreckosur të një drejtësie të munguar, e cila do të vonojë, por nuk do të harrojë.

Ndërsa i treti e ka marrë më me nge, pasi është duke na intriguar të përfytyrojmë “Bagëti e bujqësi” të Naim Frashërit në versionin digjital, sepse i kanë premtuar se ditë më të mira paskëtaj do të vijnë”, shkruan Patozi.

LEXO EDHE  Plagosi 54-vjeçarin, arrestohet pas katër ditësh i riu në Durrës

Në vijim, Kreu i Bindjes Demokratike thekson se në një situatë të tillë populli nuk di ku të përqëndrohet më parë prej këtij rivaliteti të ashpër, ndërsa në komisionin e Damianit dhe të Rudinës, që asistohet fort nga ambasadori Borchardt, po i jepen duart e fundit debatit për seksin e engjëjve, në mënyrë që asgjë thelbësore të mos ndryshojë në Republikën tonë sovrane.

“Kjo do të thotë se me reformën e re zgjedhore, si plotësim i njërit prej kushteve të Bundestagut, të garantohet për të paktën edhe 6 vjet të tjera riprodhimi normal i përbindshave politikë, që herë pas here na ftojnë të përleshemi me njëri-tjetrin për të drejtat e tyre kushtetuese, kur ia shkel kundërshtari”, shkruan Patozi.