Drejtuesi i KiE në departamentin e Krimit të Organizuar, Gianluca Esposito, ka folur për reformat e ndërmarra nga Shqipëria dhe rrugën tonë drejt integrimit europian.
Në një intervistë për gazetën “Shekulli”, Esposito tha se Shqipëria duhet të vazhdojë me përkushtim reformat kundër krimit të organizuar dhe ngritjen e organeve të drejtësisë.
“Nga këndvështrimi im, një luftë e vërtetë, efektive kundër korrupsionit, pastrimit të parave dhe krimit të organizuar është thelbësore jo vetëm për të siguruar respektimin e të drejtave të njeriut, demokracisë dhe sundimit të ligjit, por edhe për të nxitur rritjen ekonomike. Një numër reformash janë duke u zhvilluar në Shqipëri dhe angazhimi politik për t’i ndjekur ato është i dukshëm. Këto reforma përfshijnë reformën e gjyqësorit, dhe krijimin e organeve të specializuara kundër korrupsionit dhe të Byrosë Kombëtare të Hetimit”, tha drejtuesi i KiE.
“Asnjë vend nuk është imun ndaj korrupsionit. Korrupsioni është çështje e integritetit personal, jo i përkatësisë së ndonjë vendi të caktuar. Nuk ka një formulë magjike për ta luftuar atë, por ka masa që vendet mund t’i marrin dhe zbatojnë, së pari për të parandaluar korrupsionin dhe më pas, nëse dhe kur lind, shtypjen e tij. Pra, nuk është “mision i pamundur”, por vullneti politik është i nevojshëm”, theksoi ai.
Teksa u pyet për procesin e pastrimit të parave, Esposito përmendi raportin e MONEYVAL, i cili thotë se korrupsioni paraqet një risk të madh për pastrimin e parave në Shqipëri.
“Raporti MONEYVAL identifikon disa fusha që konsiderohen me rrezik të lartë, dhe këto përfshijnë korrupsionin dhe aktivitetet e krimit të organizuar. Mosrespektimi i rekomandimeve MONEYVAL mund të rezultojë në pasoja mjaft negative për ekonominë e Shqipërisë, prandaj është e rëndësishme që autoritetet shqiptare të mbajnë angazhimin e tyre për t’i adresuar ato sa më shpejt që të jetë e mundur. Qeveria është e vetëdijshme për këtë dhe ka treguar një nivel të lartë angazhimi për të adresuar ato rekomandime”, theksoi ai.
Gianluca Esposito deklaroi se Shqipëria duhet të përfundojë sa më shpejt reformat dhe të sigurohet që vendi të ketë një sistem gjyqësor plotësisht funksional dhe të pavarur
“Shqipëria ka bërë përparim në 20 vitet e fundit. Qeveritë, pavarësisht nga shumica politike, kanë ndërmarrë reforma të rëndësishme. Reformat pozitive duhet të pranohen dhe të njihen, dhe ne e bëjmë atë në raportet e GRECO-s. Në këtë drejtim është e rëndësishme të theksohet se Këshilli i Europës ka mbështetur Shqipërinë me rekomandime për forcimin e pavarësisë dhe integritetit të gjyqësorit (vlerësimet e raundit të katërt GRECO) dhe një numër i këtyre rekomandimeve janë zbatuar. Ndërsa reforma po vazhdon është e parakohshme të diskutohen për rezultatet, gjëja e rëndësishme që duhet të bëni tani është që të përfundojë sa më shpejt këtë reformë dhe të sigurohet që vendi të ketë një sistem gjyqësor plotësisht funksional dhe të pavarur i cili mund të japë rezultatet e dëshiruara në luftë kundër krimit ekonomik dhe të organizuar. Pavarësia dhe efektiviteti i sistemit është thelbësore”, tha drejtuesi i KiE.
