Pas kthimit nga vizita në SHBA, kryetarja e LSI, Monika Kryemadhi tha sot para gazetareve se një lajm i mire është se SHBA ka një vëmendje më të shtuar dhe të intensifikuar për Shqipërinë dhe rajonin në tërësi. Kriza politike ishte në qendër të diskutimeve të takimeve me zyrtarë amerikanë dhe komunitetin shqiptar në SHBA, tha Kryemadhi.
E pyetur për mundësinë për shpërndarjen e parlamentit, që u paralajmërua nga Presidenti Ilir Meta, Kryemadhi u përgjigj:
“Unë nuk mendoj se Shqipëria ka nevojë për emra të përveçëm. Ngritja e GJK është një hap për zgjidhjen e këtij problemi. Nisja e punës së GJK do jetë garanci për opozitën. Dua të theksoj se SHBA kanë vetëm një qëndrim, larg duart e politikës nga sistemi i drejtësisë që pandëshkueshmëria të mos jetë më vlerë e qeverisjes, të ndëshkohen ata që shkelin ligjet dhe janë te përfshire në proceset korruptive që kalon sot vendi”.
“Shqipëria ndodhet në një moment kritik, momenti kur ndava këtë situatë, ishte një nga momentet më të veçanta për mua. Sapo jam kthyer dhe dua të ndaj informacionet për vizitën dhe atë që partnerët ngritën si shqetësim. Kriza e rëndë politike ishte në qendër të të gjitha takimeve me zyrtarë amerikanë dhe me komunitetin shqiptar. E gjithë Shqipëria ka vëmendjen e Uashingtonit, na bën të jemi optimistë dhe të kemi besim se situata dhe zgjidhja që do ofrohet nga partnerët do jetë në funksion të qytetarëve shqiptarë. Tani SHBA ka një vëmendje të shtuar dhe më të intensifikuar për Shqipërinë dhe rajonin në tërësi. Tjetër lajm i mirë është dëgjesa që do bëhet shumë shpejt në kongresin amerikan për rajonin”, tha Kryemadhi.
