Autoriteti i Mediave Audiovizive ka rrëzuar pr/ligjin e Ramës ““Për shërbimet e medias në Republikën e Shqipërisë”, i cili ka të bëjë mediat online dhe përmes të cilit synohet kapja e tyre nga ekzekutivi.
Bordi i AMA me 5 anëtarë, tre prej të cilëve votuan kundër draftit që ishte dërguar për dhënie mendimi, nuk ka miratuar propozimet e qeverisë.
Anëtarët e AMA, Sami Nezaj, Suela Musta dhe Agron Gjekmarkaj, thanë sot se ishin kundër kalimit në Parlament të projekt ligjit.
Në këto kushte, AMA jep përgjigje negative në lidhje me ndryshimet që janë bërë ligjit “Për mediat Audiovizive në Republikëne Shqipërisë”, që synojnë rrregullimin përmes institucioneve publike të medias së shkruar online.
Projektligji ngarkon AMA dhe Këshillin e Ankesave në këtë institucion për implementimin e ndryshimeve të pritshme nëse projekligji miratohet në Parlament.
Tre anëtarët e AMA-s, paraqitën argumente që lidheshin me nevojën për forcimin e lirisë së mediave online, lirisë së mendimit dhe të drejtës për informim përmes rritjes së profesionalizmit, mbështetjes së mediave të reja, vetërregullimit të tyre, rritjes së edukimit për median, gjë që ndryshimet e parashikuara në ligj nuk e realizojnë.
Sipas 3 anëtarëve të AMA-s, propozimet e qeverisë ndrydhin lirinë dhe zhvillimin e medias informative online.
“Propozimet e qeverisë anashkalojnë një nga parimet më të rëndësishme të medias së shkruar atë të vetrregullimit ndërkohë që aktet ndërkombëtare dhe veçmas direktiva e BE për mediat audiovizive inkurajon edhe vetë rregullatorët ti japin përparësi këtij parimi.
Fatkeqësisht ndryshimet në ligj nuk janë mbështetur mbi këto praktika të vendeve të lira dhe demokratike duke i dhënë AMA, një institucioni të pavarur parlamentar ndër të tjera edhe kompetenca për vlerësimin e përmbajtjes editoriale të mediave”, thuhet në reagimin e 3 anëtarëve të Bordit të AMA.
