Një 40-vjeçar shqiptar, emri i të cilit nuk bëhet i ditur, ka mbetur i plagosur, pasi është qëlluar me armë, në një bar, në Piotello, Milano.
Raportohet se shqiptari ka marrë një plumb në bark dhe është transportuar drejt spitalit në San Raffaele.
Ngjarja mbetet një mister, pasi shqiptari nuk ka dhënë detaje rreth saj. Gjithashtu dyshohet se edhe një tjetër person i plagosur me armë zjarri, ndoshta në të njëjtin lokal, është shtruar në urgjencën e spitalit, pak minuta pas shqiptarit.
Policia ka nisur hetimet lidhur me ngjarjen, por pa mundur të zbardhë motivet apo rrjedhjen e saj.
Gjendja shëndetësore e shqiptarit paraqitet kritike për jetën.
