Kreu demokrat Lulzim Basha, i shoqëruar nga ish-deputetë të PD-së, ka marrë pjesë në homazhet e organizuara nga Shoqata Antikomuniste e ish-të Përndjekurve Politikë, që drejtohet nga Nebil Çika, për të përkujtuar 36 martirët e vrarë nga komunistët.
Basha vuri një kurorë me lule dhe ka takuar të gjithë familjet tiranase, që iu vranë familjarët.
Ndërsa qeveria dhe Bashkia e Tiranës kremtojnë 75-vjetorin e çlirimit të kryeqytetit, anti-komunistët dhe ish të përndjekurit politikë kujtuan masakrat e komunistëve mbi qytetarët më 17 nëntor 1944.
Masakrat e komunistëve gjatë dhe pas luftës nuk kursyen as të vdekurit!
Kështu, po në 17 nëntor 1944, ata kryen një nga aktet terroriste më të shëmtuarë që ka parë e dëgjuar bota. Hodhën në erë Mauzoleun e Familjes Mbretërore ku ishte varrosur Nëna Mbretëreshë, Sadie Toptani, pikërisht aty ku ndodhet sot Parku i Madh i Liqenit.
Një ditë më parë, Çika përmes një njoftimi në rrjet shkruante se historia po përsëritet, thuaj jo restaurimit të dikaturës komuniste!
“Nëse je antikomunist, nëse e do lirinë tënde e të familjes, bashkohu me ne në 17.11 .2019. ora 10.00, në përkujtimin 75-vjetorit të masakrës komuniste në Tiranë.
Diktatura është kërcënim për të gjithë ne! Reago tani që kur të vijnë te shtëpia jote të mos jesh vetëm e të mos jetë shumë vonë”, shkruante Nebil Çika.
