Ka nisur me tensione mbledhja e sotme në Komisionin parlamentar të Medias, ku kryetarja Fatjona Dhimitri ka braktisur mbledhjen, për shkak se nuk njeh Skënder Gjinushin si kryetar të Akademisë së Shkencave.
Në komisionin e medias po diskutohej lidhur me buxhetin e Akademisë së Shkencave, ku ishte i ftuar dhe Skënder Gjinushi.
“Unë refuzoj që të ulem në një tavolinë me ju, ju nuk jeni i dekretuar”, u shpreh Dhimitri dhe më pas braktisi drejtimin e mbledhjes.
Lëvizja e saj nuk është pritur aspak mirë nga kolegu socialist Besnik Bare, sipas të cilit dikush i ka fryrë në vesh Dhimitrit, që të kopjojë sjellen e Albana Vokshit.
Bare tha se Gjinushi ka të gjithë eksperiencën e nevojshme që të ngrejë Akademinë e Shkencave në nivelet më të larta, ndërsa e etiketoi Dhimitrin me fjalët ‘’kjo zonjusha, kjo zonja”.
“Është për të ardhur keq, dikush i ka thënë kësaj vajze që të jetë njësoj si Albana Vokshi, unë e quaj nder që zoti Gjinushi të jetë në krye të këtij institucioni. Unë jam i bindur që profesor Gjinushi do e ngrejë akademinë në nivele të njëjta me akademitë në vendet e zhvilluara”, u shpreh Bare./Faxnews/
