Dhjetë minuta pas Arta Vorpsit, e shpallur si anëtare e re e Gjykatës Kushtetuese nga KED dhe Rilindja, ka mbërritur në këtë institucion edhe Marsida Xhaferllari, e dekretuar nga Presidenti Ilir Meta.
Xhaferllari një ditë më parë u betua në Presidencë për detyrën e re, ndërsa Kuvendi pritet të mblidhet në një seancë të jashtëzakonshme për të marrë në shqyrtim situatën
Sikundër raportohet, në orën 07:56 ka mbërritur në mjediset e Gjykatës Kushtetuese Arta Vorpsi, e cila u “betua” një ditë më parë para noteres, duke shmangur Presidentin. Kushtetuta parashikon që anëtarët e Kushtetueses para se të marrin detyrën betohen para Presidentit, çka do të thotë se Vorpsi nuk mund të nisë zyrtarisht detyrën, pasi nuk është betuar para Kreut të Shtetit por para një noteri.
Veprimi i saj krijoi debate dhe reagime të shumta, pasi është një rast i paprecedentë që një funksionare e lartë të betohet para një noteri për marrjen e detyrës.
Rreth 10 minuta më vonë, në ambientet e Gjykatës Kushtetuese ka mbërritur Marsida Xhaferllari.
Vorpsi dhe Xhaferllari janë të dyja për një vend vakant në Kushtetuese, duke sjellë një debat mes institucionit të Presidentit dhe Kuvendit.
Nuk dihet se si mund të zgjidhet ngërçi i krijuar, kur të dy anëtaret pretendojnë vendin vakant. Vorpsi u shpall si anëtare me argumentin se Presidentit i kaluan afatet kohore, ndërsa ajo renditej e para në listën e KED. Ndërsa Presidenti Meta ka sqaruar se referuar procedurave të zgjedhjes, vakanca e tij në Kushtetuese plotësohej pasi Kuvendi të plotësonte vakancën e hapur prej tij.
