Brenda 14 dhjetorit emërohet Kryeprokurori i ri/ Ja çfarë ndodhi në KLP…

Gent Ibrahimi, kryetar i KLP-së, sqaroi sot procedurën që do ndiqet për zgjedhjen e Prokurorit të ri të Përgjithshëm.

Ai tha se asnjë nga kandidatët në garë nuk ka rezultuar në konflikt interesi, ndërkohë që shtoi se brenda 30 ditëve do të emërohet Prokurori i ri i Përgjithshëm.

“Në legjislacionin e ri ka një mekanizëm zhbllokues dhe në rast se nuk arrihet të sigurohet numri i nevojshëm që është 84 për emërimin e Prokurorit të Përgjithshëm. Nëse Kuvendi, arrin numrin e nevojshëm, atëherë mund të zgjidhet cilido nga 3 kandidatët, pavarësisht renditjes. Shpresoj se do votojnë të parin në listën e KLP-së. Por në rast se Kuvendi nuk arrin të sigurojë këtë numër votash atëherë, renditja jonë prevalon dhe prokuror do të jetë ai që ne rendisim të parin.

Kështu që në rastin më të keq, 30 ditë nga e pasnesërmja Shqipëria do të ketë prokurorin e ri”, tha Ibrahimi.

Reagimi i Ibrahimit ka ardhur në një kohë kur KLP ka miratuar “Metodologjinë orientuese për vlerësimin dhe renditjen e kandidatëve për Prokuror të Përgjithshëm”.

Metodologjia është një dokument ndihmës për Këshillin dhe do të ketë përdorim të brëndshëm për lehtësimin e veprimtarisë së tij në proçesin e përzgjedhjes të kandidatëve për pozicionin e Prokurorit të Përgjithshëm.

Në garë për postin e kryeprokurorit, garon, Arta Marku, Olsjan Çela dhe Fatjona Memçja.