Ish-deputetja e LSI-së, Silva Caka, ka reaguar ndaj mazhorancës parlamentare, e cila po synon të kapë Gjykatën Kushtetuese përmes emërimit të anëtarëve të kësaj gjykate. Debati i nisur mes Presidentit dhe KED lidhur me rradhën e zgjedhjes së anëtarëve të Kushtetueses nga Kuvendi dhe Kreu i Shtetit, ka përfshirë edhe Kuvendin.
Meta në një letër drejtuar Kryeparlamentarit Gramoz Ruçi, i kujton nenet kushtetuese lidhur me zgjedhjen e anëtarëve të Gjykatës Kushtetuese, sipas një rradhe të përcaktuar. Ndërkohë sot Kuvendi do të votojë për dy anëtarë në një listë emrash të paraqitur nga KED sipas një renditjeje të pikëzuar.
Ish-deputetja e LSI-së në një postim në rrjet akuzon Rilindjen se po emëron anëtarët e Kushtetueses. Madje ajo shprehet se kësaj i thonë “kap ça t’kapësh”. Deri më tani Kushtetuesja ka vetëm 1 anëtar, Besnik Muçin, i dekretuar nga Presidenti i Republikës.
Postimi i Silva Caka
Për Taulant Ballën, 2+2 bëjnë gjithnjë 5, mjafton që këtë t’ia kërkojë shefi i tij i radhës, por kësaj radhe situata është më e rëndë nga ç’duket!
Sipas Kushtetutës së Republikës së Shqipërisë, 4 vakancat në Gjykatën Kushtetuese plotësohen sipas kësaj radhe: Vakanca e parë plotësohet nga Presidenti, e dyta nga Kuvendi, e treta nga Presidenti dhe e katërta nga Kuvendi, duke i qendruar korrektë afateve kohore respektive.
Mirëpo në llogjikën dhe matematikën e Taulantit (sigurisht i nxitur nga Edi Rama), nuk mjafton vetëm i dyti dhe i katërti, por duan të emërojnë të dytin, të tretin dhe të katërtin.
Kësaj po që i thonë “kap ça t’kapësh”!!!
