Kuvendi votoi sot për dy anëtarët e rinj të Gjykatës Kushtetuese, me një proces që shkaktoi polemika dhe kundërshti për faktin e mosrepektimit të Kushtetutës.
Presidenti Ilir Meta iu drejtua me një apel deputetëve që para se të votojnë të lexojnë me kujdes Kushtetutën, e cila përcakton procedurat që duhen ndjekur. Dhe referuar Kushtetutës, Kuvendi nuk mund të zgjedhë dy anëtarë njëherësh, pasi procedura përcakton se nëse anëtari i parë zgjidhet nga Kreu i Shtetit, i dyti zgjidhet nga Kuvendi dhe i treti nga Gjykata e Lartë.
Por, Kuvendi e konsideroi pretendimin e Presidentit si një debat politik dhe jo procedurial. Madje, Taulant Balla tha se Presidenti duhet të heqë maskën dhe të flasë hapur. Me të njëjtën linjë ishte edhe deputetja Rudina Hajdari e “opozitës së re”, sipas të cilës Presidenti duhet të thotë nëse ka ndonjë emër në mendje, që nuk ndodhet në listën e KED-së.
Por duket se kjo situatë nuk ka shqetësuar delegacionin e BE-së në Tiranë.
“Sot Parlamenti shqiptar zgjodhi dy anëtarë të rinj të Gjykatës Kushtetuese. Ne e mirëpresim këtë vendim dhe presim krijimin e një Gjykatë funksionale sa më shpejt që të jetë e mundur. Zbatimi i reformës në drejtësi vazhdon dhe është thelbësor për Shqipërinë në rrugën e saj të integrimit në BE”, thuhet në reagimin e zyrës së Delegacionit Europian.
Nëse i referohemi zhvillimeve në rastet e ngritjes së institucioneve të reja të drejtësisë, Delegacioni i BE-së në Tiranë në jo pak raste ka heshtur ose ka mbyllur sytë, ndaj shkeljeve të denoncuara.
Kjo ka ndodhur kur Presidenti ka denoncuar vonesat në ngritjen e institucioneve për shkak të anullimit te hedhjes së shortit apo shtyrjes së tij. Gjithashtu kjo ka ndodhur kur janë denoncuar shkelje në përzgjedhjen e anëtarëve të institucioneve të reja të drejtësisë. Kjo po ndodh edhe sot.