Kreu i opozitës Lulzim Basha, ka takuar ditën e sotme investitorët shqiptarë, të cilët po përballen çdo ditë me luftën e egër qeveritare.
Në postimin e tij në Facebook, Basha thekson se sot biznesi shqiptar gjendet në vështirësi, pasi përballë ka një shtet kriminal, i cili në vend t’i suportojë po i mbyt me taksa dhe taksidarë.
Më tej kreu i PD thekson se sapo PD të vijë në pushtet do të lehtësojë nga taksat të gjitha bizneset që i japin frymëmarrje ekonomisë shqiptare.
Ja postimi i Bashës:
Biznesi është në luftë për mbijetesë si rezultat i politikave të dështuara të kësaj qeverie. Sipërmarrjet po mbyten nga rritja e taksave, kostot e larta dhe korrupsioni i kudogjendur që kanë shkaktuar klimën më të keqe të biznesit në Europë.
Ndryshe nga kjo qeveri, biznesi i çliruar, i rimëkëmbur dhe i fuqizuar është në zemër të vizionit tonë për Shqipërinë.
Sipërmarrja shqiptare ka aftësitë dhe gjenialitetin për të çarë përpara, për të arritur sukses, për të qenë shtyllë e zhvillimit, punësimit dhe mirëqenies sociale. Ajo që i duhet është një qeveri që i kupton, që i mbështet, një qeveri që ju jep pak ndihmë kur kanë nevojë; një qeveri jo për t’jua bërë jetën më të vështirë, por më të lehtë.
Prandaj ne jemi të vendosur për uljen e taksave, për luftën kundër korrupsionit dhe krijimin e kushteve të barabarta dhe konkurencës së ndershme. Ne duam që sipërmarrësit të kenë sukses, të fuqizohen, të punësojnë, të rriten.
Prej kohësh, Shqipëria po tregohet me gisht si kryeqendra e krimit në Ballkan.
Ju ftoj të punojmë së bashku që ta kthejmë në kryeqendrën e biznesit në Ballkan.
