Kreu i Grupit Parlamentar socialist, Taulant Balla, i vendosi sot një afat ligjvënësve, për të miratuar ndryshimet në Kodin Zgjedhor brenda vitit.
“I bëj thirrje deputetëve të opozitës, është në detyrën tonë historike që ne të vijojmë punën për realizimin e detyrave të shtëpisë pavarësisht nëse hapeshin apo jo negociatat më 18 tetor.
Instrumenti i vënë në dispozicion nga Bundestagu është udhërrëfyesi ynë më i mirë, duhet ta përmbylllim Kodin Zgjedhor deri në Krishtlindje se padyshim që deri në pranverën e ardhshme edhe ata që janë kundër vijimit të procesit të zgjerimit do kenë ndryshuar mendje se gabimi strategjik duhet korrigjuar menjëherë.
E përshëndes përpjekjen e komisionit për të bërë edhe ndryshimet e domosdoshsme në ligjin për financimet politike, se kemi pasur një rast kur kreu i PD është tani në hetim, duhet ti presim rrugën çdo lloj financimi të dyshimtë”, tha Balla.
Deklaratat e Ballës vijnë në një kohë kur nga opozita e bashkuar janë ngritur grupet e punës lidhur me hartimin e propozimeve mbi ndryshimet në Kodin Zgjedhor, propozime që brenda nëntorit pritet t’u dorëzohen ndërkombëtarëve.
OSBE nga ana tjetër duket se do të luajë rolin e ndërmjetësit për zgjidhjen e krizës politike në vend, të paktën sipas zyrtarëve të kësaj Organizate në Vjenë.
