Nënkryetari i Partisë Demokratike, Edi Paloka deklaron se njoftimi i policisë për zbulimin e celulës terroriste iraniane bëhet pikërisht tani sepse i duhet Ramës për të tërhequr vëmendjen e opinionit publik nga dështimi për të hapur negociatat me BE-në.
“Celula u zbulua tani, sepse tani i duhet Edi Ramës. I duhet Ramës për të tërhequr vëmendje nga negociatat. Përpiqet të sajojë histori të tjera, që do të thotë se ka gërrmuar e gërrmuar dhe iu nxori këtë të terroristëve. Qëllimi i tij ky është, të tërheqë vëmendje nga negociatat. Ishallah nuk del Ardiu Veliu nesër të thotë se janë parë UFO në Kukës”, u shpreh Paloka në studion e “News 24”.
Sipas tij, “njoftimi jepet nga policia që të krijojë panik dhe ankth te qytetarët, që t’iu thotë të mos merren me gjërat e përditshme, buka e gojës, spitalet, shkollat, se ka gjëra më madhore. Sa herë ka pas skandale, Rama përpiqet të gjejë kështu gjërash për të tërhequr vëmendjen. Sigurisht me brekushe nuk tërheq dot vëmendjen dhe nxori këtë grupin”.
Sa i përket vendimit negativ të Këshillit Europian për të mos hapur negociatat për Shqipërinë, Paloka theksoi se “ky kryeministër është i vetmi përgjegjës për mos hapjen e negociatave. Ato kushtet që shtohen e shtohen, nuk vijnë se kështu i teket gjermanëve, holandezëve apo francezëve, por se ky zotëria bën hapa pas. Kushtet ishin vetem për Shqipërinë dhe jo për Maqedoninë e Veriut”.
