Të paktën 10 qytetarë u shoqëruan nga policia pas protestës së djeshme të opozitës, megjithëse ajo ishte tërësisht paqësore, me përjashtim të disa incidenteve të vogla, që u shuan pas ndërhyrjes së drejtuesve të PD-së, kur mijëra qytetarë u mblodhën para selisë së Parlamentit.
Protestuesit u shoqëruan në komisariatin numër 1 të Tiranës, ndërsa dy prej tyre ishin anëtarë të Forumit Rinor të Partisë Demokratike.
Nuk dihet sepse policia shoqëroi për disa orë qytetarët, pasi nga të gjitha raportimet, nuk rezultoi të kishte konfrontime apo incidente, sikundër janë evidentuar në protestat e mëparshme.
Protesta e opozitës nisi rreth orës 19:00 dhe përfundoi pak përpara orës 22:00.
Mijëra qytetarë të mbledhur nga të gjitha qytetet e vendit iu përgjigjën thirrjes së opozitës për një protestë paqësore kundër qeverisë me kërkesën e vetëm: Rama ik.
