Kandidatët e Rilindjes për 30 qershorin/ Zgjedhësit të dalin të na votojnë, pasi…

Partia Socialiste vijon prezantimet e kandidatëve të saj për kryebashkiakë. Por ajo që bie në sy gjatë prezantimeve është thirrja që i bëhet qytetarëve të marrin pjesë në zgjedhje.

Në kushtet kur opozita e bashkuar nuk është regjistruar në zgjedhje dhe ka paralajmëruar se nuk do të ketë proces më 30 qershor, socialistët duket se kanë nisur fushatën për të bindur qytetarët të dalin në zgjedhje, pra të mos bojkotojnë.

Në kushtet kur janë pa kandidatë rivalë apo alternativë, duket se sfida më e madhe e socialistëve do të jetë përqindja e pjesëmarrjes, gjithmonë nëse do të ketë proces votimi.

Në Gjirokastër, Bledi Çuçi, ministër i Bujqësisë, dhe ish-ministrja e Kulturës, Mirela Kumbaro kanë prezantuar 7 kandidatët socialist për njësitë vendore në këtë qark.

LEXO EDHE  ‘Bomba’ nga opozita: Së shpejti, përgjime më të rënda se ato të BILD!

Çuçi u shpreh se 30 qershori është një moment historik për t’i dhënë qytetarëve kryetarët më të mirë dhe këshillat bashkiakë që i kanë munguar për vite me radhë.

Sipas tij, çdo zgjedhës duhet të dalë atë ditë për të votuar sepse nëse nuk voton, të tjerët do të vendosin për të. Çuçi tha se qytetarët nuk duhet t’i shkojnë pas marrëzisë së opozitës, e cila ka humbur rrugën duke bërë një gabim fatal.

Në Gjirokastër PS kandidon Flamur Golemin, në Tepelenë Tërmet Peçin, në Përmet Alma Hoxhën, në Memaliaj Gjolek Gucin, në Këlcyrë Klement Ndonin, në Libohovë Luiza Mandin dhe në Dropull Dhimitraq Tolin.