Ish-ministri i Jashtëm, Ditmir Bushati, i ftuar në rubrikën “Mbrëmje ABC” nga Mirela Milori ka deklaruar se nuk ka asnjë qejf mbetje me kryeministrin, që kur ky i fundit e shkarkoi nga posti.
Madje sipas tij ka vetëm një ridimensionim të marrëdhënieve duke qenë se nuk është më pjesë e kabinetit qeveritar.
“Nuk kam asnjë qejf mbetje. Nuk kam lindur ministër. Ministri është qiraxhi në zyrën e shtetit. Kam qenë dhe jam politikan. Kam rreth 10- vite që jam në parlament.
Nuk ka asnjë lloj qejf mbetje. Kam qenë i respektuar nga kolegët dhe kryeministri. Nuk ka ftohje, por ridimensionim të marrëdhënieve. Unë nuk jam më pjesë e kabinetit qeveritar. Për herë të parë na u dha besimi nga vendet anëtare e OSBE për të drejtuar këtë organizatë në 2020. Të gjitha këto procese nuk do ishin realizuar pa mbështetjen e kryeministrit apo kolegëve”, tha Bushati.
Për sa i përket idesë se Bushati mund të ishte kryeministër i qeverisë tranzitore të kërkuar nga opozita, ish-ministri i Jashtëm tha se janë spekulime mediatike. Ai theksoi se takohet me kryeministrin Rama sa herë që ka mbledhje kryesie, por nuk ka biseduar me të për politikën e jashtme.
“Janë spekulime. PS e ka qeverinë e saj. Nuk di që qeveritë as ndryshimi territoreve nuk mund të bëhet përmes rrjeteve sociale, as qeveritë nuk lindin përmes rrjeteve sociale. Me Ramën takohemi në mbledhje që bëjmë, qoftë mbledhjet e përjavshme të kryesisë. Nuk kemi bërë bisedë për politikë të jashtme që nga dita që u largova”, tha Bushati./abcnews.al/
