Rama me veteranët: Ka forca të brendshme që pengojnë integrimin/ Sulmon edhe Agron Tufën…

“Një forcë e brendshme është përpjekur dhe përpiqet çdo ditë të pengojë hapjen e negociatave duke e kthyer këtë objektiv kombëtar në një argument të retorikës së ditës. Ne vjet morën rekomandimin pa kushte dhe po vjet, Këshilli Evropian vendosi që për arsye të brendshme në disa prej vendeve të BE-së, kjo temë të adresohet qershorin që vjen”.

Kështu u shpreh kryeministri Edi Rama, gjatë një takimi të zhvilluar me veteran të LANÇ, në kuadër të ditës së dëshmorëve të Atdheut.

Në fjalën e tij, Rama u shfaq nervoz lidhur me çështjen e integrimit, ndërsa hodhi akuza në drejtim të opozitës.

“Këshilli Evropian vendosi që pavarësisht se negociatat nuk u çelës zyrtarisht, procesi i hulumtimit që nis me çeljen zyrtare të negociatave të fillojë, ka filluar qysh vjeshtën e shkuar.

Dërdëllisin lart e poshtë për të çakërdisur dynjanë, Shqipëria ka nisur një proces që kanë nisur të gjitha vendet pasi kanë hapur negociatat.

Rekomandimi shkon në Këshillin Evropian i përbërë nga 28 vende anëtare, të cilat vlerësojnë rekomandimin në nivel politik dhe vjet ishin shumica dërrmuese e vendeve që e pranuan rekomandimin dhe kërkuan hapjen e menjëhershme të negociatave.

Mjafton kjo për të kuptuar se ka një lidhje të drejtpërdrejtë të asaj që bën një vend për integrimin dhe asaj që vendet e tjera bëjnë në varësi të proceseve të tyre të brendshme”, theksoi Rama.

Në vijim ai theksoi se me shumë rëndësi është të kuptohet që Shqipëria do të ishte kokëulur në rast se Komisioni Evropian do të kishte rezerva.

LEXO EDHE  ‘Turizmi në Shqipëri është vari leshtë, edhe vetë Klosi pushon në Turqi’/ Gazetari ironizon ministrin

Ndërsa lidhur me debatin krimet gjatë Luftës dhe regjimit dictatorial, Rama theksoi se ka një vijë ndarëse mes ngjarjeve të Luftës Anti-Fashiste, dhe asaj që ndodhi pas Luftës me regjimin diktatorial.

“Për mua ka një vijë ndarëse mes Luftës dhe historiografisë pas Luftës. Do doja që asnjëherë të mos ngatërrojmë atë që buron nga gjaku  i pastër i Luftës Anti-Fashiste, me atë që buron nga gjakderdhja e gjakut të pafajshëm të pas luftës, për shkak të një regjimi diktatorial.

Këto gjëra duhet të jenë të ndara, për të qenë vijimisht në anën e duhur të historisë. Ajo që bëri Lufta Anti-Fashiste, ishte vendosja e shqiptarëve në anën e duhur të historisë.

Ajo që prodhoi pas lufta, nuk mund të themi që është ana e duhur e historisë. Ajo që marrim si amanet dhe si mesazh nga Lufta Anti-Fashiste, është ajo ç’ka e ktheu Shqipërinë në rrugën e ëndërruar nga Qemal Stafa dhe shumë të tjerë, ëndrrën e një Shqipërie të drejtë dhe Europiane, ku shanset jepen të gjitha për të barabartët.

Ai që mori armën deri në 44 nuk mund të jetë kurrë objekt i nje instituti qe paguhet nga taksat e shqiptarëve. Çfarë vjen më pas mund të diskutohet. Kuvendi duhet ta mbikqyrë këtë”, u shpreh Rama.”, tha ai.