Astrit Patozi, drejtues i Bindjes Demokratike, akuzoi sot Partinë Demokratike dhe kreun e saj, Lulzim Basha, se qëndrojnë pas ankesës në Kolegjin Zgjedhor, përmes të cilit Bashkimi Demokrat Shqiptar kërkon çregjistrimin e ‘BD’ si subjekt për zgjedhjet e 30 qershorit.
Patozi tha se Basha ka frikë se mos humbet karrigen e tij, ndaj dhe kërkon që Bindja të mos jetë subjekt zgjedhor për zgjedhjet lokale të 30 qershorit.
Por kundrejt deklaratës së patozit, ka reaguar ish-deputeti Flamur Noka, sipas të cilit z.Patozi në vend që të përgjigjet për firmat fallse që depozitoi për krijimin e Bindjes, sulmon Partinë Demokratike njëlloj si krijuesi i saj, Edi Rama, kur kapet duke shkelur ligjin.
“Nuk është faji i Partisë Demokratike dhe i Lulzim Bashës, që kjo partizë e Rilindjes nuk i bindet ligjit, por urdhrave të padronit të ri, që ka fuqinë ta regjistrojë në gjykatë me firma të falsifikuara dhe në KQZ, pa qenë akoma parti politike.
Urdhëri politik dhe i paligjshëm i Edi Ramës nuk mjafton për t’u regjistruar si parti farsë në zgjedhje”, thotë Noka.
Reagimi i plotë i Flamur Nokës
Këto ditë më shumë se për krijimin e saj lajmi është se qytetarët akuzojnë ‘Bindjen Demokratike’ të drejtuar nga z. Astrit Patozi se ka falsifikuar firmat e tyre për krijimin e saj.
Në vend që të pergjigjet për këto fakte të rënda të falsifikimit të firmave dhe regjistrimin e paligjshëm në zgjedhje me votën e Edi Ramës në KQZ, kjo partizë krijuese në kuzhinën e “Rilindjes”sulmoi Partinë Demokratike, njësoj si krijuesi i saj Edi Rama, kur kapet duke shkelur ligjin.
Nuk është faji i Partisë Demokratike dhe i Lulzim Bashës, që kjo partizë e Rilindjes nuk i bindet ligjit, por urdhrave të padronit të ri, që ka fuqinë ta regjistrojë në gjykatë me firma të falsifikuara dhe në KQZ, pa qenë akoma parti politike.
Urdhëri politik dhe i paligjshëm i Edi Ramës nuk mjafton për t’u regjistruar si parti farsë në zgjedhje.
Partia Bashkimi Demokrat Shqiptar nuk është parti fantazëm dhe as shtojcë dhe as nën urdhrat e Partisë Demokratike. Z Patozi këtë fakt e di shumë mirë pasi me kryetarin e saj njihet mirë sepse dikur e kemi ftuar të jetë në koalicion me PD .
Kërkesa e saj e ligjshme për të anuluar një vendim të paligjshëm të KQZ, provon se ajo është e vetmja parti e regjistruar në KQZ, që nuk kontrollohet nga Edi Rama.
Edi Rama le të krijojë sa parti të dojë, me apo pa firma falco. Opozita shqiptare është e vendosur se zgjedhje farsë, me parti falco, nuk ka për të patur as në 30 Qershor, as në 30 Dhjetor!
