Kryeministri Edi Rama ishte sot në Shkodër ku ndër të tjera pritej të publikonte edhe emrin e kandidatit apo kandidates së socialistëve për këtë bashki, në zgjedhjet vendore të 30 qershorit.
Por, kreu i qeverisë hezitoi të përmendte një emër si kandidat, pavarësisht se vlerësoi punën e bërë nga Valdrin Pjetri, i cili sot mban detyrën e Prefektit, ndërsa më parë ishte Drejtor i Përgjithshëm i ZRPP-së.
Por sipas mediave lokale, hezitimi ka pasur të bëjë me faktin se nga sondazhet që kanë bërë socialistët në këtë qytet, qoftë Pjetri, ashtu edhe ish-zv.kryeministrja Senida Mesi, që janë dy ndër kandidatët kryesorë, nuk kanë arritur të marrin 50 % të mbështetjes.
Dhe po të kihet parasysh fakti se sondazhet kanë pasur si target votuesit e majtë, duket se situate e Rilindjes në Shkodër është e rëndë.
Shkodraneës raporton se socialistët kanë vendosur të zhvillojnë edhe 3 sondazhe të tjera deri në zyrtarizimin e kandidaturës për kryetar të bashkisë Shkodër, ndërsa qoftë Pjetri, ashtu edhe Mesi, duket se nuk gëzojnë mbështetje në pjesën rurale, që përkon me 13 njësi administrative.
Qoftë Pjetri ashtu edhe Mesi, gjithashtu nuk gëzojnë mbështetjen e deputetëve të PS-së në qarkun Shkodër. Sikundër raportohet, dy kandidatët e preferuar të kupolës së Rilindjes, duket se kanë pasur përplasje dhe vijojnë të kenë me drejtuesit politikë të Qarkut të Shkodrës.
Gjithsesi vendimin përfundimtar pritet ta marrë kryeministri Edi Rama, njëkohësisht kryetar i PS-së, ndërsa gjithçka do të vendoset në mbledhjen e Asamblesë Kombëtare të kësaj partie.
