Ministri i Brendshëm, Sandër Lleshaj, ka kërcënuar organizatorët e protestës së fundit të zhvilluar në Tiranë, duke paralajmëruar mbajtjen e përgjegjësisë ligjore, publike dhe politike për aktet e dhunës.
Ndërsa ka vizituar punonjësit e policisë të lënduar në protestë, Lleshaj tha se organizatorët do të mbajnë përgjegjësi dhe se nuk është dëmtuar vetëm policia, por edhe rendi publik dhe imazhi i vendit.
”Vizitova policët e plagosur në Spitalin e Traumës. Pasojë e një protestë të dhunshme, të maskuar nga nata dhe maskat e vërteta, si ato që përdor jo rrallë krimi.
Mirënjohje për punonjësit e Policisë shqiptare. Solidaritet me fëmijët, bashkëshortet, nënat dhe familjarët e tyre.
Organizatorët dhe ekzekutorët e dhunës, kanë sulmuar jo vetëm institucionet kushtetuese dhe Policinë, por edhe qetësinë e qytetarëve, rendin publik dhe imazhin e vendit dhe për këto do të mbajnë përgjegjësi ligjore, publike dhe politike.
Dhuna nuk është opsion!”, tha Lleshaj.
