Një ditë më parë u vendos që trupat e Policisë Ushtarake dhe Batalionit Special të Sigurisë së FA-ve do të angazhohen në ruajtjen e aeroportit të vetëm ndërkombëtar në vend, “Nënë Tereza”.
Vendimi shkaktoi debate, nëse bazohet ose jo në ligj, dhe nëse respektohet apo jo Kushtetuta.
Përtej debateve dhe shkeljeve të mundshme ligjore apo Kushtetuese, pamja që ofronte sot aeroporti duket si në gjendje lufte.
Trupat ushtarake janë pozicionuar në perimetrin e jashtëm të sigurisë, ku nuk kanë munguar as patrullimet me makinat e blinduar të ushtrisë.
Kryeministri Edi Rama ka bërë një krahasim me situatat në aeroportet europiane, të cilat patrullohen me ushtarë.
Por nëse atje rreziku është terrorizmi, në Shqipëri nuk ka një alarm të tillë.
Këtu dy ditë më parë ndodhi një grabitje, në pistën e avionit, dhe grabitësit mund të rrëmbenin edhe avionin ku ishin imbarkuar pasagjerë dhe po imbarkoheshin thasët me para që do të transportoheshin drejt Vjenës. Por qëllimi i grabitësve ishte shuma e parave, të cilën patën mundësi ta zgjidhnin sa donin të merrnin dhe u larguan.
