Gjashtë milionë euro për 600 metra rrugë. Kaq është vlera e tenderit për rikonstruksionin e Bulevardit Zogu I, ndërsa nga momenti i bërjes publike të vlerës ka pasur akuza dhe reagime të shumta.
“Aktualisht ai aks rrugor është në gjendje të mjerueshme dhe vërtetë është 600 metra, por nuk kemi të bëjmë me një rikonstruksion të thjeshtë.
Bëhet fjalë për një ndërtim nga e para, që nga tubacionet e nëndheshme, pllakat, fasada e pallateve në të dy krahët dhe hapësirat mes pallateve, si lulishte e sheshe të vogla.
Nëse dikush mendon se është abuzuar, le të hapë proces gjyqësor dhe ai inxhinier të shkojë në burg. Nëse dikush mendon se e bën më lirë, le të vijë dhe të marrë pjesë në garë”, tha Veliaj.
Ndërkohë, kryebashkiaku shprehet edhe lidhur me zgjedhjet lokale të 30 qershorit, ku ai do të kandidojë për një tjetër mandate, ndërkohë që opozita ka deklaruar se nuk hyn në zgjedhje përsa kohë Edi Rama do të jetë kryeministër.
“Unë jam për një palë zgjedhje, kur përballë meje të kandidojë vetë Luli, apo vetë Saliu. Dua të vijë më i forti prej tyre, të përballet me mua, por ata nuk gjejnë një kandidat dhe kanë vendosur të mos marrin pjesë në zgjedhje.
Nëse mbaron mandati im, pa u zhvilluar zgjedhjet, atëherë firma ime nuk vlen për asgjë dhe mos harroni, firmos rreth 1000 urdhra në ditë.
Prandaj ne duhet të shkojmë në zgjedhje dhe të rinovojmë mandatin, pasi nuk mund të lëmë qytetin pa shërbime”, theksoi kreu i bashkisë, Erion Veliaj
