Banorët e Unazës së Re akuzuan Policinë e Shtetit si shkaktaren e konflikteve gjatë protestës së tyre.
“Policia nxit konfliktet, ne s’kemi nevojë për policinë e pushtetit, për policinë e drogës, rregullin e mbajmë vetë”, tha njëri prej protestuesve të Unazës së Re.
Mes tensioneve të krijuara, për shkak të disa përplasjeve mes drejtuesve të mjeteve dhe banorëve të Unazës së Re, protestuesit i bënë thirrje pjesëmarrësve që të mos përfshihen në asnjë konflikt.
“Policia na fut provokatorë gjithmonë e më shumë. Kushdo që do të provokojë protestën do të marrë përgjigjen e merituar.
Nuk na i mbyllni dot gojën, as me provokime as me arrestime”, tha protestuesi, duke shtuar se “nuk na frikësoni dot me presione”.
Në vijim ai akuzoi shefin e Komisariatit nr 6 si shkaktarin e të gjitha konflikteve dhe përplasjeve mes protestuesve të Unazës së Re dhe qytetarëve që kalojnë në këtë aks, apo provokatorëve.
