Klement Zguri, kryetar i KQZ, paraqiti para Kuvendit raportin vjetor të institucionit që drejton. Zguri paralajmëroi që zgjedhjet e ardhshme rrezikojnë të krijojnë probleme për kontestime, ilegjitimin e procesit dhe turbullime.
“Zgjedhjet janë sebepi i sherrit po rrezikojnë të bëhen edhe kurban. Për shumë njerëz çekuilibrimi politik mund të përkthehet në kolaps të procesit.
Në një kohë si kjo, politika duhet të ketë më shumë vëmendje ndaj asaj që i ndalohet. Që zgjedhjet e ardhshme të ketë sukses duhet që politika të kufizohet përndryshe zgjedhjet e ardhshme nuk do të bëhen zgjidhje për reflektim, por do të shihen si mundësi për kontestim”, tha Zguri.
Në kushte të tilla, ai apeloi që politika të zbatojë ligjet dhe t’i bindet atyre, jo thjesht të deklarojë se do i zbatojë ligjet.
Zguri tha se duhet t’i jepet fund praktikave të përdorimit të administratës shtetërore në zgjedhje, ndërsa kërkoi nga politika më shumë vëmendje për situatën e krijuar në raport me zgjedhjet.
“Mashtrimi zgjedhor, presionet zgjedhore, abuzimet me administratën, shit-blerja e votës, manipulimi zgjedhor, janë fenomene që ngarkojnë me përgjegjësi jo vetëm KQZ-në, por edhe institucioneve të tjera”, tha kreu i KQZ.
Zguri theksoi se fenomene të tilla do të mund të marrin zgjidhje vetëm me një reformë të thellë të Kodit Zgjedhor.
Sipas tij, partitë politike duhet të ofrojnë më shumë transparencë për financat e tyre.
Zguri ka sqaruar se për shkak se shumica e anëtarëve të KQZ nuk pranuan një hetim të thelluar administrativ mbi fushatat lobiste, Komisioni nuk ka mundur të hetojë mbi kontratat e lobingut të partive politike, përfshi këto edhe ato të PD-së në SHBA.
“KQZ nuk u lejua të hetonte financimet e partive”, tha Zguri, duke shtuar se korrupsioni në financim sjell korrupsionin zgjedhor.
