Kryeministri Edi Rama nuk ka kursyer kritikat në drejtim të Gjermanisë, ndërsa po fliste në Kuvend lidhur me reformën zgjedhore.
Rama tha se kushtin për reformën zgjedhore në paketën e kushteve për hapjen e negociatave nuk e ka futur Shqipëria, por Berlini.
“Nuk e kemi futur ne reformën zgjedhore, si kusht për hapjen e negociatave. E kanë futur ata (opozita_ dhe miqtë e tyre në Berlin”, tha Rama.
Deklarata e Ramës u bë në një kohë kur kreu demokrat Lulzim Basha po zhvillon një vizitë në Berlin ku do të takohet me zyrtarë të CDU dhe PPE-së.
E ndërsa duket një raport krejt normal mes kreut demokrat dhe aleates së PD-së në Gjermani, CDU-së, Kryeministri Edi Rama, duket se nuk po gëlltit dot faktin mbi “ngrirjen” e raporteve të tij me vendin më të fuqishëm të BE-së, Gjermaninë.
Megjithëse ka udhëtuar jo pak herë drejt Berlinit, Ramës i mungon një ftesë zyrtare për takime të nivelit të lartë, edhe pse në fillim të mandatit të tij si kryeministër, ai pati një suport maksimal nga kancelarja Angela Merkel.
Ndoshta këtu nis edhe problemi i Ramës me Berlinin, që e ka vizituar si kryeministër, si piktor, si turist, por që prej të paktën dy vjetësh nuk po arrin të realizojë takime të nivelit të lartë.
