Kreu i FRPD-së, Belind Këlliçi, ka ftuar qytetarët, veçanërisht të rinjtë, ti bashkohen aksionit opozitar dhe protestës së rradhës së opozitës, që do të mbahet të mërkurën para Kuvendit të Shqipërisë.
Protestuesit pritet të mblidhen në orën 09:30 në zonën rrotull Parlamentit, në protestën e 8 të organizuar, që nga momenti kur ligjvënësit opozitarë dorëzuan mandatet e deputetëve.
“Në protestën tonë kanë qenë të rinj, të papunë, naftëtarë, minatorë, persona që nuk kanë mundësi të mbyllin muajin dhe nuk kanë mundësi as të hanë bukë thatë e të ushqejnë fëmijët e tyre.
Ndaj kjo protestë ka qenë një mundësi për ti dhënë mundësinë çdo qytetari për të shprehur pakënaqësitë dhe historitë e tyre personale gjatë këtyre 6 viteve keqqeverisje të Edi Ramës”, shprehet Belind Këlliçi.
Sipas tij, situata në vend nuk është normale, ndaj largimi i Ramës është domosdoshmëri.
“Nuk mund të jetë legjitim një Parlament ku blihet vota, me një palë zgjedhje ku janë të faktuara përmes dosjeve 339 dhe 184 që janë blerë votat e qytetarëve. Ku kapen ministra, kryetarë bashkie, është vetë edhe Edi Rama në dosje, e them me përgjegjësi të plotë, në përgjime që janë faktuar duke blerë vota, dukë dhënë urdhra për blerjen e votave. Si mund të letë legjitim dhe si mund të ketë normalitet?.
Janë 110.000 të rinjtë që kanë lënë Shqipërinë gjatë viteve të fundit dhe sigurisht ata e kanë lënë, jo se në Shqipëri ka punë, jo se në Shqipëri ka një të ardhme, se është e lehtë të edukohesh por se të gjitha këto mungojnë”, shprehet Këlliçi.
