Biznesmenët indianë në kërkim nga autoritetet e vendit të tyre për vjedhje dhe pastrim parash, Nitin Jayantilal Sandesara dhe Chetankumar Jayantilal Sandesara, janë pajisur me nënshtetësi shqiptare në shkurt të 2018. Kjo do të thotë se ata kanë pasaporta shqiptare, ndërkohë që India i kërkon për pastrim parash dhe vjedhje.
Në një sqarim të Presidencës thuhet se për rastin në fjalë janë zbatuar të gjitha procedurat nga ana e institucionit të Kreut të Shtetit, ndërsa shtetësia për dy indianët është dhënë me propozim të ministrit të Turizmit dhe Mjedisit, Blendi Klosi.
Nitin Jayantilal Sandesara dhe Chetankumar Jayantilal Sandesara, të cilët akuzohen nga autoritetet indiane për vjedhjen dhe pastrimin e 725 milionë dollarëve.
Vëllezërit Sandesara kanë qenë pronarët e kompanisë farmaceutike Sterling Biotech, ku sipas informacioneve, përgjatë viteve 2008-2011 ata kanë marrë mbi 725 milionë dollarë kredi nga disa banka shtetërore të Indisë, para të cilat janë zhdukur përmes një rrjeti prej 300 kompanish offshore të ngritura nga vetë ata.
Ndërkohë Nitin Sandesara rezulton të jetë dhe konsull nderi i Shqipërisë në Nigeri me zyrën e konsullatës së nderit në Abuja.
Nitin Jayantilal Sandesara dhe Chetankumar Jayantilal Sandesara kanë hapur biznese në Shqipëri, ndërsa thuhet se po ndërtojnë edhe në jug të vendit tonë.
