Kompozitori i famshëm shqiptar, Limoz Dizdari, një prej figurave kryesore në Partinë Socialiste për vite me rradhë, i është bashkuar tryezës së thirrur nga kreu demokrat Lulzim Basha me Aleancën për Mbrojtjen e Teatrit.
Dizdari tha se është rreshtuar prej vitesh në krah të atyre që mbronin godinën e Teatrit Kombëtar, duke kundërshtuar projektin për shembjen e tij.
“Edi Rama që kur ka qenë ministër i Kulturës kishte një kërkesë për të shembur godinën e Teatrit Kombëtar. Rama e kërkonte me insistim këtë, ndërsa reagimi në mbrojtje të godinës ishte i madh.
Ramën në atë kohë, isha deputet i PS-së, e pyeta se ku do i gjente paratë dhe më tha se i kishte premtuar Qeveria greke se do të financonte projektin. Unë i thashë se në fshatim tim përdoret një shpehje: mblidhuni o gra dhe më qani burrin, se unë do iki në dasëm.
Teatri nuk u shemb në atë kohë, megjithëse shumica e ministrave ishin pro projektit të Ramës, ndërsa ne në Komisionin parlamentar të Kulturës ishim të vendosur për të mos e lejuar.
Pra për 17 vjet, Teatri Kombëtar nuk u shemb.
Unë sot doja të kisha në tryezë prokurorin Petrit Fusha, dhe ta pyesnim për këtë projektin e Teatrit.
Do të doja që këtu të kisha juristin Çlirim Gjata, që ju ka përfaqësuar në këtë debat.
Ndaj z. Basha për ccështje të tilla duhet të bashkohen të gjithë, të majtë e të djathtë”, tha Dizdari.
Në vijim ai shtoi se vjen në tryeza të tilla jo për të sharë qeverinë, por për të thënë ca të vërteta që duhen thënë.
“Mollët e këqija duhet t’i pastrojmë. Keni bërë një gjest shumë të madh, tërhoqët deputetët nga Kuvendi. Them se bëtë gjënë më të domosdoshme, nuk kishit rrugë tjetër.
Problemi është se të huajt janë kaq kundërshtarë ndaj këtij proccesi dhe cila do të jetë zgjidhja.
Përse këto institucione janë kaq refraktare, pse Kryeministri tregohet kaq kokëfortë dhe nuk e shikon realitetin kështu sikundër e shikoj unë dhe gjithë shqiptarët”, tha Dizdari.
