Një operacion special është zhvilluar në orët e para të mëngjesit të sotëm në qytetin e Shkodrës, ku janë arrestuar 11 persona, ndërsa 4 të tjerë janë shpallur në kërkim.
Nga të dhënat e prokurorisë, mësohet se personat nën hetim kishim ngritur skema të dhënies së parave me fajde me interesa që varionin nga 3 në 20 %.
Interesat varionin në varësi të shumës që persona të interesuar mund të merrnin para me fajde, por edhe kohës se kur do të shlyhej borxhi dhe interesat.
Burime nga organi i akuzës bënë të ditur për Boldnews.al se hetimet e deritanishme kanë zbuluar që pjesë e kësaj skeme ishin persona që nuk mund të merrnin kredi në banka, për shkak të mosplotësimit të dokumenteve, se mund të ishin në listat e kreditorëve të këqinj, ose për shkak të mosdeklarimit të arsyes se përse do të përdorej shuma.
Nga hetimet mësohet se skema ishte e tillë që për shuma të mëdha, aplikohej një interes i ulët nëse borxhi shlyhej sipas afateve që përcaktoheshin në kontrata, të cilat përpiloheshin në zyrat noteriale.
Nëse borxhliu nuk shlyente shumën në afat, në marrëveshje mes palëve atij i rritej interesi edhe për disa kohë, dhe nëse nuk e shlyente, atëherë humbiste kolateralin që kishte lënë si garanci.
Kryesisht për shuma të mëdha, si garanci jepeshin banesa, ambiente biznesi, sipërfaqe toke por edhe automjete.
Hetimet pritet të nxjerrin në dritë numrin e personave që janë përfshirë në skemën e ndërtuar prej disa kohësh, ndërsa vetëm në dy muajt e fundit personat nën hetim ishin vënë nën përgjim dhe gjurmoheshin nga agjentët e policisë.
Ende nuk ka një shifër zyrtare mbi shumat e parave që qarkullonin, ndërsa gjatë operacionit të sotëm u sekuestruan të paktën 500 mijë euro, si dhe disa automjete, në vlera të ndryshme.
Fenomeni i parave e fajde në Shkodër ekziston prej të paktën dy vjetësh, duke u kthyer në një shqetësim serioz. Në disa raste ngjarje kriminale deri në pëngmarrje kanë pasur si shkak pikërisht mosshlyerjen e borxheve dhe interesave në afatet e përcaktuara në kontrata të nënshkruara apo marrëveshje mes palëve të përfshira. /BN/
