Kryeministri Edi Rama dhe kreu demokrat Lulzim Basha do të jenë sot në Elbasan, qyteti ku festohet prej vitesh Dita e Verës.
Rama prej mbrëmjes së djeshme ndodhet në këtë qytet, ku ka pasur edhe një darkë me ministrat dhe anëtarët e kryesisë së PS-së. Ndërsa Basha pritet që gjatë ditës së sotme të zhvillojë turin e takimeve me qytetarët, duke iu bashkuar edhe festimeve.
Kreu i Qeverisë do të jetë në Elbasan deri në mesditë, kohë kur do të rikthehet në Tiranë.
Në orën 10:00-10:30, Rama do të vizitojë Panairin, ndërsa 10:30-10:45 do të jetë në ekspozitën me foto të arkivave të ambasadës austriake tek Portat e Kalasë
Më pas Kryeministri do të zhvillojë vizitë në Prefekturë, e cila përmbyll edhe vizitën e tij në Elbasan.
Në anën tjetër kreu demokrat, do të nisë Ditën e Verës, me vizita në familjet tradicionale të Elbasanit dhe më pas do të zhvillojë ecje në qytet duke takuar qytetarët dhe përfaqësues të bizneseve në këtë qytet.
Në hyrje të qytetit të Elbasanit janë vendosur banderola me thirrjen “Rama ik”, ndërsa burime pranë opozitës shprehen se ndaj Kryeministrit do të ketë edhe një tjetër surprizë.
Gjithsesi përjashtohet mundësia që Rama sot të përballet me ndonjë protestë të qytetarëve sikundër ka ndodhur sa herë ai viziton qytete të ndryshme.
Strukturat lokale të PD-së në Elbasan shprehen se nuk do të angazhohen në një protestë ditën e sotme, pasi do të respektohet festa e qytetarëve, Dita e Verës.
